ԵՐԵՎԱՆ, 7 հունիսի - Sputnik. Երեկ հայտնի դարձավ, որ 3 դատախազ աշխատանքից ազատման դիմումներ են գրել։ «Ժողովուրդ» օրաթերթի տեղեկություններով՝ Գևորգ Բաղդասարյանը, Պետրոս Պետրոսյանը և Արսեն Մարտիրոսյանը, իմանալով հանդերձ, որ աշխատասենյակները օպերատիվ հսկողության տակ են եղել, կարծիք են հայտնել՝ «ջանդամ իրենց չեն լսում», ու գլխավոր դատախազ Աննա Վարդապետյանի մասին վիրավորական արտահայտություններով խոսակցություններ են ունեցել։ Ըստ օրաթերթի՝ հենց դա էլ պատճառ է դարձել նրանց՝ համակարգից ազատման համար։
«Թե որքանով են համակարգում տարածված այս խոսակցությունները իրական, ցույց կտա ժամանակը, սակայն երեկվանից համակարգում ակտիվ խոսում են այս մասին։ Տարածված լուրերի մասով մեկնաբանություն խնդրեցինք Գլխավոր դատախազությունից, որտեղից ի պատասխան հերքեցին այն»,– գրում է թերթը։
Հիշեցնենք, որ հունիսի 6–ին հայտնի դարձավ, որ աշխատանքից ազատման դիմում են ներկայացրել գլխավոր դատախազի տեղակալ Գևորգ Բաղդասարյանը և Կոտայքի մարզի դատախազ Պետրոս Պետրոսյանը, որոնք Ռոբերտ Քոչարյանի՝ «Մարտի 1»-ի գործով մեղադրողներն էին։ Բացի այդ, աշխատանքից ազատման դիմում է գրել նաև Սերժ Սարգսյանի գործով դատախազ Արսեն Մարտիրոսյանը»:
Հավելենք՝ Գևորգ Բաղդասարյանը 2018 թվականից 2020 թվականը զբաղեցրել է Երևան քաղաքի դատախազի պաշտոնը։ 2020 թվականի օգոստոսի 24–ից Հայաստանի Հանրապետության գլխավոր դատախազի տեղակալն է։ Իսկ Պետրոս Պետրոսյանը ՀՀ Կոտայքի մարզի դատախազ է նշանակվել 2020 թվականին։ Նախքան դա նա զբաղեցնում էր ՀՀ գլխավոր դատախազության ավագ դատախազի պաշտոնը