ԵՐԵՎԱՆ, 6 հունիսի – Sputnik. ԱՄՆ–ն անհամբերությամբ սպասում է Հայաստանի և Ադրբեջանի ԱԳ նախարարների միջև բանակցությունների հերթական փուլի անցկացմանն այս ամսվա վերջին։ Այս մասին ճեպազրույցի ընթացքում հայտնել է ԱՄՆ պետդեպարտամենտի խոսնակի առաջին տեղակալ Վեդանտ Պատելը` անդրադառնալով հարցին` արդյոք առաջիկայում նախատեսվում է Վաշինգտոնում ևս մեկ բանակցություն անցկացնել Երևանի և Բաքվի միջև։
«Դեռ հստակ ժամկետներ չկան, որպեսզի որևէ բան կարողանամ ասել։ Բայց կարող եմ ասել, որ մենք անհամբերությամբ սպասում ենք բանակցությունների հերթական փուլի անցկացմանը Վաշինգտոնում այս ամսվա վերջին։ Կողմերը շարունակում են ձգտել, որպեսզի Հարավային Կովկասի տարածաշրջանում խաղաղ ապագա հաստատվի»,– ասել է Պատելը։
Նա վերահաստատել է նաև նախկինում իր ասած այն միտքը, որ երկխոսությունն առանցքային է խնդիրները լուծելու, ինչպես նաև տևական ու արժանապատիվ խաղաղության հասնելու համար։ ԱՄՆ պետդեպարտամենտի ներկայացուցիչը շեշտել է` ԱՄՆ–ն ուրախ է, որ Հայաստանի և Ադրբեջանի միջև բանակցությունները շարունակվում են տարբեր հարթակներում։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։