ԵՐԵՎԱՆ, 5 հունիսի – Sputnik. Զոհվածի մոր` Գայանե Հակոբյանի նկատմամբ այսօր դատարանի կայացրած որոշումը պաշտպանական կողմի համար անակնկալ չէր։ Դատական նիստից հետո Երևան քաղաքի առաջին ատյանի ընդհանուր իրավասության քրեական դատարանի մոտ լրագրողների հետ զրույցում ասաց Հակոբյանի փաստաբաններից Գեորգի Մելիքյանը։
«Առավոտից խաղ էր գնում Վերաքննիչի որոշման հետ կապված, և առաջին ատյանի այս որոշումը կայացվել է շատ ավելի վերևում, այլ ոչ թե դատարանում։ Մենք այն համոզմանն ենք, որ վարչապետի կողմից կա ուղղակի ճնշում դատարանի վրա։ Իրավական պաշտպանություն այստեղ չկար»,– հայտարարեց նա։
Այսօր հայտնի էր դարձել, որ զոհված զինծառայողի մոր խափանման միջոցը Վերաքննիչ դատարանը փոխել է՝ ընտրվել էր տնային կալանքը։ Պաշտպանները ցանկանում էին խափանամն այս միջոցը ևս փոխել ավելի մեղմ տարբերակով։ Փոխարենը, սակայն, Երևանի ընդհանուր իրավասության քրեական դատարանի դատավոր Մանվել Շահվերդյանը որոշեց զոհված զինծառայող Ժորա Մարտիրոսյանի մոր` Գայանե Հակոբյանի տնային կալանքը փոխարինել կալանքով` 1 ամիս 15 օրով։ ՀՀ վարչապետի որդին` Աշոտ Փաշինյանն էլ մինչ այդ հայտարարել էր, որ տնային կալանքը կարող է շատ ավելի մեղմ համարվել, և ճիշտը կալանքն է։
Ըստ Գեորգի Մելիքյանի, կալանքը` որպես խափանման միջոց ընտրելիս դատարանը միայն հիմնվել է մեղադրող դատախազի այն խոսքերի վրա, թե ռիսկը մեծ է, որ Գայանե Հակոբյանը կրկին հանցանք կգործի։
«Խոչընդոտելու կամ նոր հանցանք կատարելու ռիսկը ինչպե՞ս կարող է լինել հիմք կալանքի համար։ Ինչ վերաբերում է դատախազի խոսքին, ապա այն դատարկախոսություն էր, ոչ մի փաստական հիմք չներկայացրեց։ Խափանման միջոցը առաջին ատյանի դատարանը կարող էր փոխել, եթե դատախազը հիմնավոր փաստարկներ ներկայացներ, սակայն նման ոչ մի բան չլսեցինք»,– ընդգծեց պաշտպանը։
Գայանե Հակոբյանի պաշտպանը ևս մեկ անգամ ընդգծեց, որ առաջին ատյանի այս որոշումը միանշանակ բողոքարկելու են։
Հիշեցնենք` մայիսի 17-ին տեղեկություն տարածվեց, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Վերջինս հաղորդում էր ներկայացրել ոստիկանություն, որից հետո ՀՀ քննչական կոմիտե քրեական գործ է հարուցել մարդուն առևանգելու հոդվածով, կալանավորվել է մեկ անձ` Գայանե Հակոբյանը։