ԵՐԵՎԱՆ, 5 հունիսի – Sputnik. Շենգենյան վիզաների ազատականացման հարցում Հայաստանը ԵՄ–ի հետ կոնսենսուսի դեռ չի հասել։ Այս մասին եվրոպական ինտեգրման մասով 2022 թվականի արդյունքների վերաբերյալ ԱԺ–ում տեղի ունեցող քննարկմանն ասաց ՀՀ արտգործնախարար Արարատ Միրզոյանը։
«Վիզաների ազատականացման հարցը մեր և Եվրոպական միության անդամ հանդիսացող առանձին երկրների օրակարգերում մշտապես ակտիվորեն քննարկվում է։ Գրեթե բոլոր դեպքերում աջակցություն ենք ստանում։ ԵՄ–ի կողմից նման որոշում կայացնելու համար կոնսենսուսային դիրքորոշում է պետք, և այս թեմայի շուրջ դեռևս այդ կոնսենսուսին հասնել հնարավոր չի եղել»,– նշեց Միրզոյանը։
Հիշեցնենք, որ վիզաների ազատականացման երկխոսության բանակցությունները սկսելու վերաբերյալ քննարկումները սկսվել են դեռ 2019 թվականից, երբ ՀՀ վարչապետ Նիկոլ Փաշինյանը հանդիպել էր Եվրոպական հանձնաժողովի նախագահ Ժան–Կլոդ Յունկերի հետ։
Այս տարվա մայիսի 30-ին Հայաստանի և Սլովենիայի խորհրդարանների նախագահների հանդիպմանը կարևորվել էր վիզաների ազատականացման երկխոսության մեկնարկը։