ԵՐԵՎԱՆ, 5 հունիսի – Sputnik. «Բնակչության բժշկական օգնության և սպասարկման մասին» օրենքում փոփոխություններով սահմանափակվում է ՄԻՊ-ի՝ բժշկական գաղտնիք համարվող տվյալները ստանալու լիազորությունը։ Այս մասին նախագծի վերաբերյալ դիրքորոշման մեջ նշել է պաշտպան Անահիտ Մանասյանը։
Նախագծով օրենքից հանվում են բժշկական գաղտնիք համարվող տվյալները, առանց պացիենտի կամ նրա օրինական ներկայացուցչի համաձայնության, կառավարության սահմանած կարգով Մարդու իրավունքների պաշտպանին փոխանցելու հնարավորություն նախատեսող դրույթը։
«Հարկ ենք համարում նշել, որ նախագծով առաջարկվող փոփոխություններով ըստ էության սահմանափակվում է պաշտպանի՝ բժշկական գաղտնիք համարվող տվյալները ստանալու լիազորությունը։ Մասնավորապես, օրենքից վերոնշյալ դրույթը հանելով ,ստացվում է, որ պաշտպանի կողմից պետական և տեղական ինքնակառավարման մարմիններից, այլ կազմակերպություններից օրենքով սահմանված կարգով անհրաժեշտ անձնական տվյալները կարող են ստացվել պաշտպանին ներկայացված բողոքի առկայության պարագայում, ինչը համարվում է բողոք ներկայացրած անձի համաձայնություն»,-նշվում է պաշտպանի դիրքորոշման մեջ։
Մանասյանը կարծում է, որ բժշկական գաղտնիք համարվող տվյալները պաշտպանին կարող են փոխանցվել ոչ միայն դիմումների առկայության պարագայում, այլև մշտադիտարկումներ և սեփական նախաձեռնությամբ քննարկումներ իրականացնելիս։
ՄԻՊ-ը կարևոր է համարում օրենքով սահմանված դրույթի պահպանումը, որը նախատեսում է պաշտպանին առանց պացիենտի կամ նրա օրինական ներկայացուցչի համաձայնության բժշկական գաղտնիք համարվող տվյալները փոխանցելու հնարավորություն:
Դիրքորոշմամբ հատուկ ընդգծվում է, որ դա անհրաժեշտություն է գործառույթների արդյունավետ իրականացման համար։
«Դա բխում է պաշտպանի լիազորությունների արդյունավետ իրականացմանը վերաբերելի միջազգային և ներպետական չափանիշներից»,-հավելում է Մանասյանը։
Նշենք, որ «Բնակչության բժշկական օգնության և սպասարկման մասին» օրենքում փոփոխություններ և լրացումներ կատարելու մասին» օրենքի նախագծի 3-րդ հոդվածով առաջարկվում է օրենքի 11-րդ հոդվածի 5-րդ մասի 9-րդ կետը շարադրել հետևյալ խմբագրությամբ. «քննիչին, դատախազին, դատարանին` իրենց վարույթային պարտականությունները կատարելիս` Հայաստանի Հանրապետության քրեական դատավարության օրենսգրքով սահմանված կարգով` բացառությամբ նույն օրենսգրքով նախատեսված փորձաքննություններով փորձագետի կազմած եզրակացությունների»։
Օրենքի 11-րդ հոդվածի 5-րդ մասի 9-րդ կետով սահմանված է, որ առանց պացիենտի կամ նրա օրինական ներկայացուցչի համաձայնության բժշկական գաղտնիք համարվող տվյալները փոխանցվում են նաև Մարդու իրավունքների պաշտպանին։
Պաշտպանի ամբողջական դիրքորոշումը՝ այստեղ։