ԵՐԵՎԱՆ, 4 հունիսի - Sputnik. Սերբիայի նախագահ Ալեքսանդր Վուչիչը հայտարարել է, որ ամեն օր սպանության մինչև 200 սպառնալիք է ստանում, սակայն իր՝ որպես պետության ղեկավարի աշխատանքն է «հանդուրժել այդ խոզությունը»։ Տեղեկությունը հայտնում է ՌԻԱ Նովոստին:
Սերբիայում հունիսի 4-ին նշվում է ՆԳՆ և Ոստիկանության օրը: Պետության ղեկավարը, ներքին գործերի նախարար Բրատիսլավ Գաշիչի հետ այսօր ստուգել է սարքավորումները, զենքը և տեխնիկան, այդ թվում՝ ուղղաթիռները, ինչպես նաև ՆԳՆ նոր հրամանատարա-օպերատիվ կենտրոնը, որը կապված է 4 հազար փողոցային տեսախցիկների հետ: Նախագահի և նախարարի առջև երդում են տվել ոստիկանության ուսումնական հաստատությունների շրջանավարտները, որից հետո տեղի է ունեցել մեկ տարվա ընթացքում աչքի ընկած աշխատակիցների պարգևատրման արարողությունը:
«Ես հանրապետության նախագահն եմ, և իմ գործն է հանդուրժել մահվան սպառնալիքները։ Չգիտեմ՝ արդյոք դա պաշտոնապես հետապնդվում է, թե չէ, ինչ վերաբերում է ինձ, ամեն օր ավելի քան 200 սպանության սպառնալիք եմ ստանում։ Երբ դուք նախագահ եք, սովորում եք հանդուրժել դա», - ասել է Վուչիչը ճեպազրույցի ժամանակ։
Այսօր Բելգրադում տեղի է ունեցել Սերբիայի գործող իշխանության քաղաքականության հակառակորդների 5-րդ զանգվածային երթն ու հանրահավաքը: Ցուցարարները հավաքվել են երկրի խորհրդարանի շենքի մոտ և երթով անցել քաղաքի կենտրոնական փողոցներով։ Մասնակիցների թվի մասին պաշտոնական տվյալներ չկան, ընդդիմադիր լրատվամիջոցները հայտնում են ավելի քան 10 հազար մարդու մասին:
Սերբիայի մայրաքաղաքում մայիսի 26-ին տեղի էր ունեցել ամենամեծ հանրահավաքը՝ ի պաշտպանություն նախագահ Վուչիչի և կառավարության: Չնայած հորդառատ անձրևին, ըստ կառավարամետ լրատվամիջոցների, 200 հազար մարդ էր հավաքվել: Վուչիչը հաջորդ օրը հայտնել է իշխող Սերբական առաջադիմական կուսակցության առաջնորդի պաշտոնից հեռանալու մասին:
Նա զանգվածային ցույցերի ֆոնին հայտարարել էր, որ Սերբիայում բռնի իշխանափոխություն տեղի չի ունենա, ինչպես Կիևում 2014 թվականին: