ԵՐԵՎԱՆ, 4 հունիսի – Sputnik. Բելգիայի ԱԳՆ-ն ու ՊՆ-ն «առաջին հնարավորության դեպքում» կդիմեն Ուկրաինայի իշխանությանը պարզաբանումներ ստանալու համար՝ կապված ՌԴ Բելգորոդի մարզում ուկրաինական դիվերսիոն-հետախուզական խմբի կողմից բելգիական արտադրության զենքի օգտագործման հետ։ Տեղեկությունը հայտնում է ՌԻԱ Նովոստին՝ հղում անելով բելգիական Soir թերթին։
Ավելի վաղ Washington Post թերթը հայտնել էր, որ մայիսի վերջին Բելգորոդի շրջանի վրա հարձակված ահաբեկիչները ամերիկյան, լեհական, չեխական ու բելգիական տրանսպորտ ու զենք են օգտագործել: Մասնավորապես, նրանք կիրառել են Բելգիայի և Չեխիայի արտադրության հրացաններ և առնվազն մեկ ԱՏ-4 հակատանկային համալիր, որն օգտագործվում է ԱՄՆ-ի և արևմտյան երկրների զինված ուժերի կողմից։ Ուկրաինայում կռվող ամերիկացի վարձկաններից պարբերականի ստացած տեղեկատվության համաձայն՝ BREN և SCAR հրացանները տրամադրվում են ուկրաինացի զինվորականներին և գրոհայիններին։
«Բելգիայի պաշտպանության նախարար Լյուդիվին Դեդոնդերը և արտգործնախարար Աջա Լյաբիբը առաջին իսկ հնարավորության դեպքում կկապվեն Ուկրաինայի իշխանության հետ՝ պարզաբանումներ պահանջելու համար», - գրում է Soir-ը՝ հղում անելով իրազեկ աղբյուրներին:
Բրյուսելում ընդգծում են, որ զենքը նախատեսված էր բացառապես ուկրաինական զինված ուժերի օգտագործման համար՝ «իրենց տարածքն ու բնակչությանը պաշտպանելու» նպատակով:
«Դա ուղղակիորեն նշվում է զենքի մատակարարման յուրաքանչյուր ուղեկցող փաստաթղթում», - ընդգծել է թերթի աղբյուրը:
Ավելի վաղ Բելգիան հայտնել էր Ուկրաինային SCAR հատուկ նշանակության ուժերի համար գրոհային հրացաններ, ԱՄՆ-ի արտադրության AIM -120 «օդ-օդ» դասի հրթիռներ, M72 ձեռքի հակատանկային նռնականետեր, հակատանկային զինամթերք ու տեղական արտադրության ավտոմատ զենք մատակարարելու մասին: Բացի այդ, Բելգիան մտադիր էր զրահատեխնիկա և բեռնատար մեքենաներ ուղարկել Ուկրաինա։