ԵՐԵՎԱՆ, 2 հունիսի – Sputnik. Հայաստանի ապագա սերունդները պետք է ունենան Հայաստանի Հանրապետության «կադաստրի» լրացված և ամբողջական «վկայական»: Այս մասին ֆեյսբուքյան իր էջում գրել է ՀՀ վարչապետ Նիկոլ Փաշինյանը։
Նա ընդգծել է, որ որպես ՀՀ վարչապետ ուզում է հասնել այդ արդյունքին։
Նշենք, որ նույն միտքը Փաշինյանը կրկնել էր նաև երեկ` հունիսի 1–ին, «Մանուկ Բեյի» պալատում Մոլդովայի հայ համայնքի ներկայացուցիչների հետ հանդիպմանը:
Նա նշել էր, որ «կադաստրի վկայականը» ձևակերպելու ճանապարհին շատ կարևոր քայլեր են արել, ինչ, որ վերահաստատված չէր, վերահաստատելով քայլ-քայլ գնում են առաջ:
Հիշեցնենք` ապրիլի 24–ին կառավարության հետ հարց ու պատասխանի ժամանակ Նիկոլ Փաշինյանը՝ արձանագրելով ընդդիմության այն թեզին, որ Հայաստանը Բրյուսելում ամեն ինչ զիջել է Ադրբեջանին, փոխարենը ոչինչ չի ստացել, նշել էր, որ «Հայաստանն իր հազարամյա գոյության ընթացքում երբեք «կադաստրի վկայական» չի ունեցել, և եթե ամեն ինչ ստացվի, ապա իր պատմության մեջ առաջին անգամ կստանա այն»։
Նա նշել էր, որ 30 տարի ապրում ենք մի տեղ, որի «կադաստրի վկայականը» չունենք:
«Եթե այն, ինչ ուզում ենք անել, ստացվի, մենք պատմության մեջ առաջին անգամ կստանանք «կադաստրի վկայական», սեփականատեր կլինենք ոչ միայն դե ֆակտո, այլև դե յուրե»,- նշել էր Փաշինյանը։
Նա ընդգծել էր, որ ուզում է հաղթահարել տնվորի կարգավիճակը, ունենալ «վկայական», որի անունն է պետություն, միջազգայնորեն ճանաչված դեմարկացված և դելիմիտցված սահմաններով ։
Վարչապետը նաև նշել էր, որ եթե ամեն ինչ հաջողվի, ապա ԼՂ-ի հայության իրավունքների և անվտանգության հարցով կընթանա ինստիտուցիոնալ բանակցային գործընթաց։