ԵՐԵՎԱՆ, 2 հունիսի – Sputnik. ԱՄՆ նախկին նախագահ Դոնալդ Թրամփը մտադիր է ուղիղ բանակցություններ կազմակերպել Ռուսաստանի և Ուկրաինայի միջև, եթե կրկին նախագահ դառնա: Նա այդ մասին ասել է «Fox News» հեռուստաալիքին։
«Մեր զինվորականները զինամթերք չունեն, գրեթե ամեն ինչ փոխանցել ենք Ուկրաինային։ Մենք կօգնենք մարդկանց, բայց ես ուզում եմ դադարեցնել պատերազմը, չեմ ուզում, որ այն շարունակվի։ Ես երկուսին էլ գիտեմ․.. Ես լեզու եմ գտել նրա հետ (Վլադիմիր Զելենսկի. խմբ.), ես լեզու եմ գտել Պուտինի հետ․.. Եվ գիտեմ թիվ մեկ ճիշտ ուղին: Պետք է ասել` ոչինչ չեք ստանա, քանի դեռ պայմանավորվածություն չկա», - ընդգծել է Թրամփը։
Նշենք, որ ԱՄՆ նախկին նախագահ Դոնալդ Թրամփը բազմիցս քննադատել է Ջո Բայդենին, որ թույլ է տվել Ուկրաինայի հակամարտությունը, ինչը, պետության նախկին ղեկավարի կարծիքով, հղի է ԱՄՆ-ի և Ռուսաստանի միջուկային առճակատմամբ:
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են մինչ օրս։