ԵՐԵՎԱՆ, 1 հունիսի – Sputnik. Հայաստանում 2023 թվականի առաջին չորս ամսվա տվյալներով մանկական պատվաստումների ցուցանիշներն աճել են նախորդ տարիների նույն ժամանակահատվածի համեմատ, խորհրդարանում բյուջեի կատարողականի քննարկման ժամանակ հայտնեց ՀՀ առողջապահության նախարար Անահիտ Ավանեսյանը։ Նրա խոսքով՝ հունվար-ապրիլին պատվաստվել է մինչև 1 տարեկան երեխաների 91,3 տոկոսը։
«2020 թվականին մինչև 1 տարեկան երեխաների ներգրավվածությունը պատվաստումների գործընթացում կազմել է 89.1%, 2021 թվականին՝ 91%, 2022 թվականին՝ 90%»,- նշել է Ավանեսյանը։
Նրա խոսքով՝ նմանատիպ իրավիճակ է եղել նաև մինչև 2 տարեկան երեխաների շրջանում՝ 2020 թվականին ներգրավվածությունը կազմել է 89,1%, 2021 թվականին՝ 90,4%, 2022 թվականին՝ 91,1%։
Ավանեսյանը ընդգծել է, որ գերատեսչությունը խնդիր է դրել 2026 թվականին այդ ցուցանիշները հասցնել 95 տոկոսի ընդգրկվածության։ Բացի այդ, հաջորդ տարվանից նորակոչիկներից նրանք, ովքեր հիվանդ չեն եղել, կպատվաստվեն ջրծաղիկի դեմ։