ԵՐԵՎԱՆ, 31 մայիսի – Sputnik. Հայաստանում ԵՄ դեսպան Անդրեա Վիկտորինն ուզում է, որ Ստամբուլյան կոնվենցիան վավերացվի։ Այս մասին նա նշեց Ժողովրդավարության հայկական ֆորումի ժամանակ։
«Ուզում եմ, որ Ստամբուլյան կոնվենցիան վավերացվի։ Ես գիտեմ՝ կան մարդիկ, որոնց դուր չի գա այն նախադասությունը, որը ես արտաբերեցի, սակայն ես կրկնում եմ՝ այն միտված է կանանց պաշտպանությանը։ Ակնկալում եմ, որ քաղհասարակության ներկայացուցիչները պիտի կարողանան մեզ աջակցել»,- նշեց նա՝ անդրադառնալով գենդերային հավասարությանը։
Դեսպանի խոսքով՝ կան հասարակական կազմակերպություններ, որոնք շատ լավ են աշխատում։ Վիկտորինը շեշտեց, որ կանանց դեմ բռնության կոալիցիան ու այլ կազմակեպություններ աջակցում են այն իրավունքերին, որոնք տրվում են հաշմանդամություն ունեցող կանանց։
«Մեծ աշխատանք է կատարվում, սակայն այդ աշխատանքը կարող է շատ ավելին լինել»,- հավելեց ԵՄ դեսպանը։
Նշենք, որ Անդրեա Վիկտորինը 2022 թվականի նոյեմբերին նույնպես ասել էր, որ ժամանակն է, որպեսզի Հայաստանը վավերացնի Ստամբուլյան կոնվենցիան։ Դրանից հետո սոցցանցերում այս թեմայի շուրջ ակտիվ քննարկումներ էին սկսվել։
Այդ ժամանակ խոսվում էր նաև, որ Ստամբուլյան կոնվենցիան վավերացնելուց հետո պետք է Սահմանադրության մեջ էլ փոփոխություններ անել և օրինականացնել միասեռականների ամուսնությունները։
Հիշեցնենք` 2018-ի հունվարի 18-ին ՀՀ–ն ստորագրել է Ստամբուլյան կոնվենցիան, բայց չի վավերացրել։ Ստամբուլյան կոնվենցիա պայմանական անունը ստացած «Կանանց նկատմամբ բռնության ու ընտանեկան բռնության կանխարգելման» կոնվենցիան պարբերաբար թեժ քննարկումներ ու բանավեճեր է առաջացնում Հայաստանում։
Ստամբուլյան կոնվենցիայի վերաբերյալ վերապահումներ է հայտնել նաև Հայ առաքելական եկեղեցին։ Հոգևոր առաջնորդները կոչ էին արել չընդունել այն։
Այս պահի դրությամբ Ստամբուլյան կոնվենցիան վավերացրել են ԵԽ 47 անդամ երկրներից 38-ը։