ԵՐԵՎԱՆ, 31 մայիսի – Sputnik. ՀՀ աշխատանքի և սոցիալական հարցերի նախարարությունը փորձում է վաշխառությամբ նպաստ ստացող մարդկանց ուղղորդել աշխատանքի։ Ազգային ժողովում 2022 թվականի բյուջեի արդյունքները ներկայացնելիս այս հայտարարությունն արեց գերատեսչության ղեկավար Նարեկ Մկրտչյանը։
Նա նշեց, որ 2022 թվականի հունվարի 1-ի դրությամբ եղել է 85 843 նպաստառու ընտանիք, իսկ 2023 թվականի հունվարի 1-ի դրությամբ նրանց թիվը կազմել է 76 131։
«Այսինքն՝ վարչարարության արդյունավետության բարձրացման արդյունքում 9712-ով նվազել է նպաստառու ընտանիքների թիվը։ Եթե մենք անարդար որոշումներ կայացրած լինեինք, վստահ եմ` արդեն բողոքի ձայնը լսած կլինեինք, քանի որ խոսքը ընտանիքների մասին է, որտեղ մի քանի անձ կա։ Սխալ վարչարարության հետևանքով կան այնպիսի ընտանիքներ, որոնք իրականում պետք է ստանային ծառայություններ, բայց դուրս են մնացել համակարգից։ Այն անձինք, որոնք վարչարարության սխալի պատճառով նպաստ էին ստանում, իսկ հիմա զրկվել են դրանից, թշնամաբար չենք մոտենում, հակառակը՝ փորձում ենք նրանց ուղղորդել աշխատանքի»,- ասաց Մկրտչյանը։
Նախարարն ընդգծեց, որ սա շարունակական գործընթաց, է և բազմաթիվ համակարգային խնդիրներ ի հայտ են եկել Միասնական սոցիալական ծառայության ստեղծմամբ։ Նախարարությունը այդ հարցերի շուրջ նաև իրավապահ մարմինների ուշադրությունն է հրավիրել։