ԵՐԵՎԱՆ, 30 մայիսի – Sputnik. Թուրքիայի արտաքին գործերի նախարար Մևլութ Չավուշօղլուն ամերիկացի գործընկերոջ` Էնթոնի Բլինկենի հետ քննարկել է հացահատիկային գործարքն ու Շվեդիայի՝ ՆԱՏՕ-ին անդամակցելու գործընթացը: Տեղեկությունը հայտնում է ՌԻԱ Նովոստին՝ հղում անելով Թուրքիայի ԱԳՆ-ին։
«Բանակցությունների ընթացքում քննարկվել են Ռազմավարական մեխանիզմի (Անկարայի եւ Վաշինգտոնի միջև. խմբ.) առաջիկա նիստի նախապատրաստական աշխատանքները, պաշտպանական արդյունաբերության ոլորտում համագործակցությունը, Նյու Յորքում թուրքական տան վրա հարձակումը, Շվեդիայի` ՆԱՏՕ–ին անդամակցելու գործընթացը և հացահատիկի վերաբերյալ ստամբուլյան համաձայնագիրը»,-ասված է հաղորդագրության մեջ:
Հացահատիկային գործարքը, որը 2022 թվականի հուլիսի 22-ին ստորագրել են Ռուսաստանի, Թուրքիայի, Ուկրաինայի և ՄԱԿ-ի ներկայացուցիչները, ենթադրում է ուկրաինական հացահատիկի, պարենի և պարարտանյութերի արտահանում Սև ծովով երեք նավահանգիստներից` ներառյալ Օդեսան: Նավերի տեղաշարժի համաձայնեցմամբ զբաղվում է համատեղ համակարգող կենտրոնը։ ՌԴ նախագահ Վլադիմիր Պուտինը սեպտեմբերին հայտարարեց, որ Արևմուտքն ուկրաինական հացահատիկի մեծ մասն արտահանում է իր պետություններ, ոչ թե Աֆրիկայի կարիքավոր երկրներ։
Հացահատիկային նախաձեռնությունը փաթեթային պայմանավորվածության բաղկացուցիչ մասն է։ Երկրորդ մասը՝ Ռուսաստան–ՄԱԿ հուշագիրը, որը նախատեսված է երեք տարվա համար, նախատեսում է Ռուսաստանից պարենի և պարարտանյութերի արտահանման ապաշրջափակում, «Ռոսսելխոզբանկի» վերամիացում SWIFT-ին, գյուղատնտեսական տեխնիկայի, պահեստամասերի և սպասարկման մատակարարումների վերականգնում, «Տոլյատի-Օդեսա» ամոնիակատարի աշխատանքի վերականգնում և մի շարք այլ միջոցառումներ:
Մայիսի 18-ին հայտնի դարձավ, որ գործարքը երկարաձգվել է մինչև հուլիսի 17-ը ներառյալ` առանց որևէ փոփոխության: