ԵՐԵՎԱՆ, 29 մայիսի – Sputnik. Թուրքիայի և Ռուսաստանի նախագահներ Ռեջեփ Թայիփ Էրդողանն ու Վլադիմիր Պուտինը հեռախոսային բանակցություններ են ունեցել։ Այս մասին գրում է Sabah թերթը` հղում անելով Թուրքիայի նախագահի վարչակազմին։
«Ռուսաստանի նախագահ Վլադիմիր Պուտինը զանգահարել է Թուրքիայի նախագահ Ռեջեփ Թայիփ Էրդողանին և շնորհավորել նրան պետության ղեկավարի ընտրություններում տարած հաղթանակի առիթով», – հայտնել է թերթը։
Ավելի ուշ երկու երկրների առաջնորդների միջև տեղի ունեցած զրույցի մասին հայտնեց նաև Կրեմլի մամուլի ծառայությունը։ Նշվում է, որ Պուտինը ջերմորեն շնորհավորել է Էրդողանին վերընտրվելու կապակցությամբ, իսկ թուրք գործընկերը հաստատել է արդիական ամբողջ օրակարգով հետագա աշխատանքի տրամադրվածությունը։
Պայմանավորվածություն է ձեռք բերվել շարունակել անձնական շփումը։
«Վլադիմիր Պուտինն ընդգծել է Էրդողանի մեծ ներդրումը ռուս–թուրքական կառուցողական և փոխշահավետ հարաբերությունների զարգացման մեջ», – ասվում է հաղորդագրության մեջ։
Հաղորդագրության մեջ նշվում է, որ իր առաջնորդին թուրք ժողովրդի ցուցաբերած աջակցությունը լրացուցիչ հեռանկարներ է բացում տարբեր ուղղություններով գործնականում երկկողմանի համագործակցության ընդլայնման համար։