ԵՐԵՎԱՆ, 25 մայիսի – Sputnik. ՀՀ ազգային ժողովի 107 պատգամավորից ոչ ոք չմասնակցեց Վճռաբեկ դատարանի քաղաքացիական պալատի դատավորի ընտրությանը։
Դատավորի թափուր տեղի համար առաջադրվել էր Վահագն Թորոսյանի, Լիլիթ Խաչատրյանի և Անի Մխիթարյանի թեկնածությունները:
Հաշվիչ հանձնախմբի նախագահ Նարեկ Բաբայանը գաղտնի քվեարկությունից հետո հայտնեց, որ խորհրդարանի 107 պատգամավորից որևէ մեկը չի մասնակցել քվեարկությանը։
ԱԺ փոխխոսնակ Հակոբ Արշակյանը նշեց, եթե թեկնածուներից որևէ մեկը չի ընտրվում, ապա անցկացվում է ընտրության երկրորդ փուլ, որին կարող են մասնակցել առաջին փուլում առավել ձայներ ստացած 2 թեկնածուն։
Սակայն, քանի որ ո՛չ Թորոսյանը, ո՛չ Խաչատրյանը և ո՛չ էլ Մխիթարյանը ձայներ չեն ստացել, ապա երկրորդ փուլ չի կարող լինել։ Արշակյանը շեշտեց, որ այժմ հարցը ԲԴԽ դաշտում է, և 10-օրյա ժամկետում նրանք պետք է առաջադրեն թեկնածուների հաջորդ եռյակին։