ԵՐԵՎԱՆ, 25 մայիսի – Sputnik. ՀՀ ԱԺ իշխող խմբակցության պատգամավոր Արթուր Հովհաննիսյանը նախկին պատգամավոր Միհրան Պողոսյանին հորդորում է անձամբ գալ Հայաստան ու պատմել կոկաինի և բանանի ներմուծման մասին։ Այս մասին Հովհաննիսյանն ասաց Ազգային ժողովում լրագրողների հետ ճեպազրույցում` անդրառնալով այս թեմայով ՀՀ վարչապետ Նիկոլ Փաշինյանի և ՀՀԿ նախկին պատգամավոր Միհրան Պողոսյանի հայտարարություններին։
Հայտնել ենք, որ մայիսի 24-ին ԱԺ-ում ՀՀ վարչապետ Նիկոլ Փաշինյանը հայտարարել էր, թե Հայաստան ներմուծված 1 տոննա կոկաինի հասցեատերը բանանի ներկրմամբ զբաղվող հայտնի ընկերություն է, որի սեփականատերը ԱԺ նախկին պատգամավոր է և այժմ գտնվում է հետախուզման մեջ (նկատի ուներ ՀՀԿ–ական նախկին պատգամավոր, ԴԱՀԿ նախկին պետ Միհրան Պողոսյանին,–խմբ.)։ Վերջինս իր հերթին հայտարարություն է տարածել՝ նշելով` ինքն է ԱԱԾ տնօրենին տեղեկացրել, որ կոնտեյների մեջ բանանի փոխարեն կոկաին է եղել։
«Ավելի լավ է՝ այդ անձնավորությունը (Միհրան Պողոսյանը,–խմբ.) գա, ներկայանա նախաքննական մարմնին և ավելի մանրամասն պատմի իր առնչությունը բանանի ու կոկաինի, մնացած հանցագործությունների հետ։ Հետևաբար, նրա մեկնաբանություններն իմ կողմից ընդհանրապես մեկնաբանման արժանի չեն։ Ես նկատել եմ, որ մեր ընդդիմությունն ավելի լավ է տեղյակ կոկաինի գործից․ ընդդիմությանը հարցրեք կոկաինի գործից»,- հայտարարեց Արթուր Հովհաննիսյանը։
Իշխանական պատգամավորը նաև ասաց, որ քրեական գործի մանրամասներին չի տիրապետում և չի կարող մեկնաբանել, թե այդքան հսկողություն անցելուց հետո կոկաինն ինչպես չի հայտնաբերվել հենց սահմանին։
Դիտարկմանը, թե ՔՊ-ական մեկ ուրիշ պատգամավոր՝ Էդուարդ Աղաջանյանը, հայտարարել էր, թե ՀՀ-ում միջին վիճակագրական խնջույքն առանց թմրադեղի չի անցնում, Արթուր Հովհաննիսյանը դա սխալ մեկնաբանություն համարեց՝ հայտարարելով, թե պատգամավորի նշած արտահայտությունը հնչել է կոնկրետ համատեքստում, և համեմատություն անցկացնելը տեղին չէ։
Հիշեցնենք` Իտալիայի մաքսային ոստիկանությունը երկրի հարավում գտնվող Ջոյա Տաուրո նավահանգստում 2 տոննա 734 կգ բարձր մաքրության կոկաին էր հայտնաբերել։ Թմրանյութը գտնվել է երկու կոնտեյներների մեջ, այն թաքցրել են 78 տոննա բանանի խմբաքանակում: Բեռը Էկվադորի Գուայակիլ նավահանգստից Հայաստան պետք է տեղափոխվեր վրացական Բաթումի նավահանգստով։ Դրանից հետո Հայաստանի ԱԱԾ–ն հայտնեց, որ Էկվադորից Հայաստան է ներմուծվել շուրջ մեկ տոննա կոկաին (մոտ 250 միլիոն եվրո արժողության):