ԵՐԵՎԱՆ, 25 մայիսի – Sputnik. Իշխանական և ընդդիմության պատգամավորների միջև երեկ տեղի ունեցած ծեծկռտուքից հետո ՀՀ ազգային ժողովի այսօրվա հերթական նիստին լարվածությունը դեռ պահպանվում է։
Ավելի վաղ հայտնել էինք, որ վիճաբանությունն ու ծեծկռտուքը սկսվել էր Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրված թեկնածուների հետ կապված քննարկման ժամանակ, երբ «Հայաստան» խմբակցության պատգամավոր Արթուր Սարգսյանը մեղադրանքներ էր հնչեցրել դատավորի թեկնածու Արմեն Դանիելյանի հասցեին։ ՔՊ–ական պատգամավոր Հովիկ Աղազարյանն էլ դիտողություն էր արել Արթուր Սարգսյանին, ինչից էլ իրավիճակը բորբոքվել էր։
«Հայաստան» խմբակցության պատգամավոր Աղվան Վարդանյանը նշեց` այն մարդը, որը հայտարարում էր, թե իշխանությունն ընդդիմության հետ կառուցողական երկխոսության մեջ է արդեն, ցավոք, սխալվեց։
«Որոշ ժամանակ առաջ մեկն ասել էր, որ առաջ իշխանությունն ու ընդդիմությունը վիճում էին, կռվում էին, հիմա արդեն լսում ենք իրար։ Ցավոք, նա ճիշտ դուրս չեկավ։ ՔՊ–ական պատգամավորը, որը շատ հաճախ չի հասկանում՝ ինչ է խոսում, երեկ սադրեց, հրահրեց։ Երկրորդ խնդիրն էլ անվտանգության աշխատակիցների վարքագիծն է, որն անօրինական է և անթույլատրելի պատգամավորների հանդեպ»,- նշեց Վարդանյանը։
Ընդդիմադիր պատգամավորը վստահեցրեց` նման վարքագիծը երբեք չեն հանդուրժելու։
ՔՊ–ական պատգամավոր Հովիկ Աղազարյանն էլ արձագանքեց Վարդանյանի խոսքերին և շեշտեց, որ իր մատնանշած մարդը, ում անունը չնշվեց` ինքն է։
«Ես դեռ մի քանի դրվագով կանդրադառնամ ձեզ։ Խնդրում եմ ուշադիր լինեք իմ ելույթներին»,– ասաց իշխանական պատգամավորը։
ԱԺ փոխխոսնակ Ռուբեն Ռուբինյանը նախազգուշացում հայտարարեց Աղվան Վարդանյանին`տեղից խոսելու և Աղազարյանի հասցեին վիրավորական կերպով արտահայտվելու համար։