ԵՐԵՎԱՆ, 24 մայիսի – Sputnik. ՀՀ կառավարությունն ամենայն հավանականությամբ կդիմի ԱԺ–ին ոռոգման համար Սևանից լրացուցիչ ջուր վերցնելու համար։ Այս մասին այսօր ԱԺ–ում կառավարության հետ հարց ու պատասխանի ժամանակ հայտարարեց ՀՀ ՏԿԵ նախարար Գնել Սանոսյանը։
Նա տեղեկացրեց, որ այս պահին բավական բարդ ու ծանր իրավիճակ է ստեղծվել ոռոգման համակարգում։ Այն խոշոր ջրամբարները, որոնք սնուցում են համակարգը ջրի պակաս ունեն։
«Մենք ինչքան հնարավոր է ավելի շատ կաշխատեցնենք պոմպակայանները, չխնայելով որևէ դրամ կամ էլեկտրաէներգիա, որպեսզի Սևանից քիչ ջրառ իրականացնենք»,– ասաց նա։
Նախարարը տեղեկացրեց, որ այսօր առավոտի դրությամբ այդ պակասը արդեն 250 մլն մետր խորանարդի է հասնում։ Հիմնականում խնդիր ունեն Ախուրյանի, Ազատի, Ապարանի ու Մարմարիկի ջրամբարը։
«Խնդիրը հատկապես բարդ է Ապարանի ջրամբարի ոռոգման գոտում, որտեղ այլ փոխարինող չկա և Ախուրյանի ջրամբարում, որտեղ 160 մլն խորանարդ մետր ավելի քիչ ջուր կա, քան նախորդ տարի այս նույն օրը»,–ասաց նա։
Գնել Սանոսյանը հավելեց, որ գետերում ջրի ծավալն այս պահին նույնպես քիչ է։
Նախարարը վստահեցրեց, որ դժվարությամբ, բայց կառավարությունը կկարողանա կառավարել այս գործընթացը։