ԵՐԵՎԱՆ, 24 մայիսի – Sputnik. ՀՀ առողջապահության նախարարությունը պետպատվերի շրջանակում ներդրել է հերթագրման նոր համակարգ, որն առաջացրել է քաղաքացիներից շատերի դժգոհությունը։ ԱԺ–ում հարցուպատասխանի ժամանակ «Քաղաքացիական պայմանագիր» խմբակցության պատգամավոր Տրդատ Սարգսյանը հարց ուղղեց ՀՀ առողջապահության նախարար Անահիտ Ավանեսյանին` խնդրելով պարզաբանել, թե ինչու մի շարք քաղաքացիներ չեն կարողանում իրացնել իրենց պետպատվերով հետազոտվելու կամ բուժում ստանալու իրավունքը։
Առողջապահության նախարար Անահիտ Ավանեսյանը տեղեկացրեց, որ վերջին ամսում իրականացվել է հերթագրման համակարգի ավտոմատացված ընդհանրական ներդրում, ինչը հանգեցրել է նրան, որ այլևս բժշկական կենտրոնները չեն կարող հերթագրումից դուրս պացիենտներին սպասարկել։
Դա վերաբերում է պլանային հետազոտություններին և բժշկական օգնությանը։
«Կարծում ենք`սա շատ կարևոր, սկզբունքային նորամուծություն է և պետք է օգնի, որ մենք ունենանք կարգավորված, հստակ ու թափանցիկ դաշտ թե՛ պացիենտների, թե՛ ԲԿ–ների համար»,–ասաց նախարարը։
Նրա խոսքով` ցանկացած նորամուծությունից հետո առաջին 1–2 շաբաթվա ընթացքում որոշակի անհարմարություններ լինում են, բայց աշխատանքային կարգով դրանք կվերացվեն։