ԵՐԵՎԱՆ, 24 մայիսի – Sputnik. Ազգային ժողովի նախագահ Ալեն Սիմոնյանը խորհրդարանում տեղի ունեցած քաշքշուկի համար նախազգուշացում է հայտարարալ իշխող «Քաղաքացիական պայմանագրի» պատգամավոր Հովիկ Աղազարյանին և ընդդիմադիր «Հայաստան» դաշինքի պատգամավոր Արթուր Սարգսյանին:
ԱԺ–ում Արթուր Սարգսյանի ելույթից հետո, որտեղ նա մեղադրանքներ էր հնչեցրել դատավորի թեկնածու Արմեն Դանիելյանի հասցեին, իշխանական և ընդդիմադիր պատգամավորների միջև քաշքշուկ էր սկսվել։
«Ցանկություն չկա որևէ ձևով լարելու իրավիճակը։ Կարող էի, օրինակ, մինչև օրվա վերջ արգելել պատգամավորների մուտքը նիստերի դահլիճ կամ կանոնակարգ օրենքով նախատեսված այլ միջոցներ ձեռնարկել, բայց դրան չեմ գնում, չեմ էլ կարծում, որ դա ճիշտ է»,– ասաց Ալեն Սիմոնյանը։
Ըստ ԱԺ նախագահի` կատարվածը կազմակերպված սադրանք էր, որին իշխող ուժը չենթարկվեց։
«Օրինակ ՝ անսպասելի դահլիճում հայտնվեց մի պատգամավոր, որը նախկինում երբեք չէր ներկայացել՝ Իշխան Սաղաթելյանը, իմ նախկին տեղակալը, որ ԱԺ–ի մասին ասում էր՝ «Սա Ալեն Սիմոնյանի «բեսեդկան» չի»։ Այո', սա Ալեն Սիմոնյանի «բեսեդկան չէ», բայց նաև ձեր «դուքյանը» չէ»,–ասաց Սիմոնյանը։
Նշենք, որ ՀՀ ազգային ժողովում Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրված դատավորների թեկնածուների հարցն է քննարկվում։
Դատավորների թեկնածուների մեջ է նաև Արմեն Դանիելյանը, որը Արթուր Սարգսյանին կալանքի որոշում տված դատավորն էր։