ԵՐԵՎԱՆ, 23 մայիսի – Sputnik. ՀՀ վարչապետ Նիկոլ Փաշինյանն ու Միացյալ Թագավորության Եվրոպայի հարցերով պետնախարար Լեո Դոքերթին քննարկել են Բաքվի և Ստեփանակերտի միջև երկխոսության միջազգային մեխանիզմի ներդրման հարցը։ Տեղեկությունը հայտնում է վարչապետի մամուլի ծառայությունը։
Զրուցակիցներն անդրադարձել են նաև հայ-ադրբեջանական հարաբերությունների կարգավորման գործընթացին, տարածաշրջանային տրանսպորտային և տնտեսական ենթակառուցվածքների ապաշրջափակմանը, Հայաստանի և Ադրբեջանի միջև սահմանազատման և սահմանային անվտանգության ապահովման աշխատանքներին, Լեռնային Ղարաբաղի շուրջ իրավիճակին, մասնավորապես, Ադրբեջանի կողմից Լաչինի միջանցքի ապօրինի շրջափակման հետևանքով ԼՂ-ում ստեղծված հումանիտար ճգնաժամին։
«Վարչապետը նշել է, որ ոչ միայն միջանցքը շրջափակելու, այլ նաև ԼՂ ժողովրդին գազի և էլեկտրաէներգիայի մատակարարումներից զրկելու Ադրբեջանի քաղաքականության նպատակն է էթնիկ զտման ենթարկել ԼՂ հայությանը»,– նշված է հաղորդագրության մեջ։
Դոքերթին ընդգծել է, որ Միացյալ Թագավորությունը հետաքրքրված է տարբեր ուղղություններով կապերի ընդլայնմամբ:
Փաշինյանը կարևորել է Միացյալ Թագավորության հետ տարբեր ոլորտներում սերտ համագործակցությունը, համոզմունք է հայտնել, որ երկկողմ հարաբերություններն ունեն առաջընթացի մեծ ներուժ:
Քննարկվել են առևտրատնտեսական փոխգործակցությանը, արևային էներգետիկայի և այլ ոլորտներում ծրագրերի իրականացման հնարավորությունները։ Փաշինյանը շեշտել է, որ ՀՀ կառավարությունը շահագրգռված է, որ հայկական շուկայում բրիտանացի ներդրողներ ներգրավվեն։
Նիկոլ Փաշինյանն ընդունել է ՄԹ Եվրոպայի հարցերով պետնախարար Լեո Դոքերթիին
Հիշեցնենք` մայիսի 22-ին ԱԳ նախարար Արարատ Միրզոյանի հետ հանդիպման ժամանակ Դոքերթին հայտարարել էր երկու երկրների միջև ռազմավարական երկխոսության գործընթացի մեկնարկի մասին։ Նա հույս էր հայտնել, որ դա տեղի կունենա տարվա երկրորդ կեսին։ Դոքերթին նաև շեշտել էր, որ Միացյալ Թագավորության` ղարաբաղյան հարցի հետ կապված դիրքորոշումը չի փոխվել. ՄԹ–ն ուզում է համապարփակ խաղաղություն տեսնել հնարավորինս շուտ։