«Թեյի միջազգային օր» նշելու նպատակը հասարակության և քաղաքական գործիչների ուշադրությունը հրավիրելն է թեյի առևտրի խնդիրներին, թեյի արտադրությամբ զբաղվող աշխատողների սոցիալական դիրքին, դժվարություններին, որոնք ծագում են մանր արտադրողների և մեծ ընկերությունների պայքարում, ինչպես նաև աշխարհում այս ըմպելիքի տարածմանը։
Եվրոպայում և հետխորհրդային որոշ երկրներում կոճապղպեղի, դարչինի, մեխակի հավելումով թեյն առավել շատ է տարածված։ Հայաստանում վերջին տարիներին տարածված են նաև լեռնային խոտաբույսերից պատրաստված թեյերը, որոնք նույնպես համարվում են բուժիչ։ Ավելի տարածված խոտաբույսերից են ուրցը, դաղձը և անանուխը։
Սև թեյի հայտնի տեսակներից են ասսամը, նեպալը, դարջլինգը, նիլգիրին, ռիզեն, քիմիոնը և ցեյլոնը։ Սև թեյի որոշ տեսակներ չեն թրմվում 90 °C-ից ցածր ջերմաստիճանում։
Կանաչ թեյը պատրաստում են 80-85 °C ջերմաստիճանում։ Մարոկկոյում կանաչ թեյը թրմում են մոտավորապես 15 րոպե։ Թրմամանը, որի մեջ պատրաստվում է թեյը, նախապես տաքացվում է` դրա շուտ սառչելը կանխելու համար։ Բարձորակ կանաչ և սպիտակ թեյերին կարող ենք կրկին ջուր ավելացնել 5-ից ավելի անգամ, դա արդեն կախված է տեսակից և ավելացվող ջրի ջերմաստիճանից։
Ծաղկային թեյը թրմում են 100 °C ջերմաստիճանում, թրմման տևողությունը 3 րոպե է, թրմումը կատարվում է ապակե ամանի մեջ։