ԵՐԵՎԱՆ, 21 մայիսի – Sputnik. Արցախի նախկին պետնախարար Ռուբեն Վարդանյանը Արցախի սրտում գտնվող Հակոբավանքից տեսաուղերձով դիմել է ՀՀ վարչապետ Նիկոլ Փաշինյանին և մատնանշել օրվա իշխանության սխալները։
«Ես չգիտեմ, դուք ինչքան ժամանակ եք մնալու ղեկավար, պարոն Փաշինյան, բայց ինչ-որ դուք անում եք, ասում եմ՝ դուք վտանգավոր բան եք անում, դուք ոչ թե փորձում եք պաշտպանել հայ պետությունը, ձեր իշխանությունը, այլ փորձում եք մեզ դարձնել ստրուկ և արժեք չունեցող մարդ»,–ասել է Վարդանյանը։
Նրա խոսքով` Փաշինյանի մոտ չի ստացվելու այս ամենը երկար շարունակել։
«Երբ որ մենք թույլ ենք տալիս մեզ ասել, որ ունենք հազարավոր դասալիքներ, երբ որ մենք խոսում ենք, որ հայ կանայք երջանիկ չեն, երբ որ մենք խոսում ենք, որ հնարավոր է մարդու երեսին թքել և դա նորմալ է, երբ որ մենք խոսում ենք, որ եկեղեցու դեմ կարելի է այսպես քարոզարշավ սկսել, երբ որ կարելի է Արցախ ասել ու նշել՝ մենք ինչ կապ ունենք, մատ թափ տալ Ազգային ժողովում ու ասել՝ դուք ով եք, որ մեզ բան եք ասում, եթե կարելի էր հասկանալ, որ կարող են զոհեր լինել հազարավոր, բայց չկանգնեցնել պատերազմը, և դա դառնում է ստանդարտ. դա ամենամեծ վտանգն է, որ մեզ սպառնում է, որովհետեւ մենք դավաճանում ենք ոչ թե ինչ-որ գաղափար, այլ դավաճանում ենք մեր հայրենիքը, ամենախորքային մեր ուժին՝ ով է հայը»,–ընդգծել է Վարդանյանը:
Հիշեցնենք` ավելի վաղ Տավուշի մարզում տեղի ունեցած միջոցառումներից մեկի ժամանակ ՀՀ վարչապետ Նիկոլ Փաշինյանի կինը` Աննա Հակոբյանը հայտարարել էր, որ 44-օրյա պատերազմի ընթացքում 11 հազար դասալիք ենք ունեցել՝ զինվորականներ, կամավորականներ, սպաներ և այլն:
Նիկոլ Փաշինյանն էլ իր հերթին Տավուշում դպրոցականների հետ հանդիպմանը հայտարարել էր, որ եթե եկեղեցին ուզում է քաղաքական գործունեություն ծավալել, Հայաստանը ժողովրդավարական երկիր է, կարող է կուսակցություն ստեղծել ու դրա շրջանակներում նաև քաղաքական գործունեություն ծավալել։ Միևնույն ժամանակ նա ընդգծել էր՝ եկեղեցին չի կարող բարձր լինել պետությունից։