ԵՐԵՎԱՆ, 17 մայիսի – Sputnik. Ո՞նց կարող է կինը տղամարդուն առևանգել։ Քննչական կոմիտեի Շենգավիթ քննչական բաժնից դուրս գալով` լրագրողների հետ զրույցում նշեց 44-օրյա պատերազմում զոհված Ժորա Սահակյանի հայրը` Վահիդ Սահակյանը, որը, ըստ իրավապաշտպան Ռուբեն Մելիքյանի, բերման ենթարկված 4 ծնողներից մեկն էր։
«Աշո՛տ, ամո՛թ քեզ, որտեղ տեսնեմ, ասելու եմ` դու տղա չես, ոնց որ հորդ ենք ասում թուրք, դավաճան։ Գիշերը եկեք, նորից տարեք, հասցես կա ոստիկանությունում, ամեն տեղ կա։ Չե՞ս ամաչում, կնոջ դեմ բողոք ես ներկայացնում»,– դիմելով Աշոտ Փաշինյանին` նշեց նա։
Նա որոշ մանրամասներ հայտնեց իր ձերբակալման մասին, մասնավորապես, նշեց, որ իրեն ձեռնաշղթաներով են բաժին տարել։
«Մոտ 6 ժամ մի երկու թուղթ են լրացրել, թե Փաշինյանի տղայի առևանգման կասկածանքով բերման են ենթարկել»,– ասաց նա։
Տղամարդը զարմացած է, թե ինչու Աշոտ Փաշինյանն ընթացքի ժամանակ իրեն դուրս նետեց մեքենայից։
Րոպեներ անց ազատ արձակվեցին նաև Գարիկ Գալեյանը և Վիգեն Ազատյանը։ Նա նշեց` երևի իշխանություններն ինչ–որ ուժ են տեսնում ծնողների մեջ, զգուշանում են նրանցից, դրա համար էլ փորձում են «գործ կարել» իրենց վրա։
Հիշեցնենք, որ այսօր «Հայկական ժամանակը» գրել էր` «Որդիների կանչ» ՀԿ անդամ 44-օրյա պատերազմում զոհվածների ծնողները փորձել են առևանգել Աշոտ Փաշինյանին։ Թերթը նշել էր, թե ծնողները ստիպել են Աշոտ Փաշինյանին նստել իրենց մեքենան, սակայն մի պահ կանգ առած ընթացող մեքենայից Աշոտ Փաշինյանին հաջողվել է դուրս նետվել, որի հետևանքով նրան վրաերթի է ենթարկել նույն կազմակերպության անդամների հետևից ընթացող մեքենան:
Sputnik Արմենիայի հետ զրույցում ՀԿ նախագահ Վահիդ Սահակյանը հերքել էր այս լուրը` նշելով, որ միջադեպ եղել է, բայց առևանգման փորձ` ոչ, դա ապատեղեկատվություն է։
44-օրյա պատերազմում զոհված Մխիթար Գալեյանի հայրը՝ Գարիկ Գալեյանը, նույնպես հերքել է այն տեղեկությունը, որ ինքը «Որդիների կանչ» հասարակական կազմակերպության այլ անդամների հետ փորձել է առևանգել ՀՀ վարչապետ Նիկոլ Փաշինյանի որդուն։
Հավելենք, որ ըստ ՔԿ մամուլի խոսնակ Գոռ Աբրահամյանի` Աշոտ Փաշինյանի կողմից ՀՀ ոստիկանությունում ներկայացված հաղորդումը փոխանցվել է ՀՀ քննչական կոմիտե։ Ձերբակալվել է մեկ անձ։