ԵՐԵՎԱՆ, 13 մայիսի – Sputnik․ Մայիսի 13-ին նախատեսված Երևան-Ստամբուլ-Երևան չվերթը հետաձգվել է։ Տեղեկությունը հայտնում է չվերթն իրականացնող «FlyOne Armenia» ավիաընկերության մամուլի ծառայությունը։
Նշվում է, որ պատճառն օդանավի տեխնիկական անսարքությունն է, չվերթը կկայանա մայիսի 14-ին՝ ժամը 00։20-ին։
Հետաձգման մասին հայտարարվել է Երևան-Ստամբուլ-Երևան չվերթի բոլոր ուղևորներին։
«Ի պատասխան ստացվող հարցումների հայտնում ենք նաև, որ ավիանընկերությունը չէր կարող օգտագործել այլ օդանավ չվերթն իրականացնելու համար, քանի որ Թուրքիայի ավիացիոն իշխանությունները թուլտվություն են տվել միայն սահմանափակ քանակի օդանավերի համար»,–ասվում է հաղորդագրության մեջ։
Ընկերությունից վստահեցնում են, որ թե՛ Երևանում, թե՛ Ստամբուլում կեցության կարիք ունեցող բոլոր ուղևորներին տեղավորել են հյուրանոցներում մինչև չվերթի իրականացումը։
Ավիաընկերությունը հայցում է ուղևորների ներողամտությունը պատճառված անհարմարության համար։
Հիշեցնենք` ապրիլի 29-ին Անկարան, առանց նախնական ծանուցման, չեղյալ է համարել Flyone Armenia-ին նախկինում տրված թույլտվությունը Թուրքիայի օդային տարածքով դեպի Եվրոպա թռիչքներ իրականացնելու համար՝ դա բացատրելով Երևանում «Նեմեսիս» գործողության հերոսների հուշարձանի բացմամբ.
Ավելի ուշ պաշտոնական Անկարան, Թուրքիայի արտգործնախարար Մևլութ Չավուշօղլուի բերանով, պահանջել էր ապամոնտաժել Երևանում տեղադրված հուշարձանը։
«FlyOne Armenia»-ն 2021 թվականի հոկտեմբերի 27-ին է ստացել ավիափոխադրողի վկայական։ Թռիչքներ է իրականացնում մի քանի ուղղություններով՝ Մոսկվա, Լիոն, Փարիզ, Ստամբուլ, Բեյրութ։ Ընկերության ավիապարկը բաղկացած է Airbus A320 ինքնաթիռներից։ Ընկերությունը պատկանում է ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանի ընտանիքին։