ԵՐԵՎԱՆ, 13 մայիսի – Sputnik․ Բելգիայի Թագավորությունը որոշում է կայացրել դիվանագիտական ներկայացուցչություն բացել Հայաստանում (Երևան): Տեղեկությունը հայտնում է Բելգիայի արտաքին գործերի, եվրոպական հարցերի և արտաքին առևտրի նախարարությունը։
«Կովկասում Բելգիան ներկա կլինի Հայաստանում։ Բելգիան լիովին աջակցում է եվրոպական ջանքերին, որոնք կարող են նպաստել Հայաստանի և Ադրբեջանի միջև խաղաղ գործընթացին, այդ թվում՝ Հայաստանում ԵՄ քաղաքացիական դիտորդների առաքելության միջոցով, որով Բելգիան ցանկանում է իր ներդրումն ունենալ»,- ասված է երկրի ԱԳՆ-ի հաղորդագրության մեջ։
Նշվում է, որ Բելգիան մեծ նշանակություն է տալիս Հարավային Կովկասում կայունությանն ու բարիդրացիությանը։ Գերատեսչությունից ընդգծում են, որ Երևանում դիվանագիտական առաքելության բացումը, Բաքվում արդեն գոյություն ունեցող իրենց դեսպանատան հետ միասին, այդ տեսլականի իրագործման համար է։
Բելգիայի ԱԳ նախարարությունից շեշտել են, որ մտադիր են դիվանագիտական ներկայացուցչություն բացել նաև Մոլդովայում (Քիշնև)։
Բալկաններում Բելգիան դեսպանատներ ունի Խորվաթիայում և Սերբիայում։