ԵՐԵՎԱՆ, 12 մայիսի – Sputnik. Ադրբեջանում պահվող հայ գերիների թվին առնչվող ՀՀ իշխանությունների մոտեցումն արդարացված չէ։ Այս մասին մամուլի ասուլիսին ասաց Համեմատական իրավունքի կենտրոնի ղեկավար Սիրանուշ Սահակյանը` ներկայացնելով Իրավունքի և արդարության կենտրոն «Թաթոյան» հիմնադրամի տնօրեն Արման Թաթոյանի հետ համատեղ ստեղծած զեկույցը։
«Նրանց (ՀՀ իխշխանությունների– խմբ.) համար ավելի հեշտ է փոխհարաբերվել Ադրբեջանի և Թուրքիայի իշխանությունների հետ, եթե խոսեն նրանց պաշտոնական թվերով։ Այսինքն` հայկական կողմից բացահայտումները և տվյալներն անտեսում են, ու այստեղ միասնականություն կա Ադրբեջանի կողմից ներկայացված թվերի առնչությամբ։ Դա իմ գնահատմամբ արդարացված չէ»,– նշեց Սահակյանը։
Այս համատեքստում նա ընդծգեց, որ հայ և միջազգային իրավապաշտպանները, Հայաստանի քննչական մարմինները արձանագրել և բացահայտել են գերեվարման ավելի մեծաքանակ դեպքեր, քան պաշտոնականացվել է Ադրբեջանի կողմից։ Սիրանուշ Սահակյանի կարծիքով` հայկական կողմը պետք է առաջ տանի իր տվյալներն ու աղբյուրները, ոչ այն թվերը, որոնք հնչեցնում է Ադրբեջանը։
«Մենք 80 դեպքի մասով տվյալներ ենք փոխանցել միջազգային կազմակերպություններին, և դա օդից վերցրած թիվ չէ։ Կա հստակ նկարագրություն, յուրաքանչյուր դեպքի վերաբերյալ էլ ապացույցներ են առկա»,– ընդգծեց իրավապաշտպանը։
ՀՀ իշխանությունների տվյալներով ադրբեջանական գերության մեջ 33 հայ զինծառայող և քաղաքացիական անձ կա։ Բաքուն էլ հաստատում է 33 անձի գերի լինելու փաստը։ Հայ իրավապաշտպանների տվյալներով` ադրբեջանական գերության մեջ է գտնվում 80 անձ։