ԵՐԵՎԱՆ, 12 մայիսի – Sputnik. «Սարդարապատ» ակումբը կտա խոստումնալից կադրեր, որոնք հետագայում կփայլեն ոչ միայն Հայաստանի բարձրագույն խմբում, այլև եվրոպական բարձրակարգ առաջնություններում։ Այս մասին այսօր կազմակերպված ասուլիսում վստահեցրեց հայկական նորաստեղծ ակումբի հիմնադիր նախագահ Սևան Կարիանը` նշելով, որ ֆրանսիական «Լանս» ակումբի հետ համագործակցության շրջանակում «Սարդարապատը» զարգացման հիանալի հեռանկար ունի։
Սևան Կարիան
© Sputnik / Asatur Yesayants
Կարիանը հայտնեց, որ ֆրանսիական կողմը տարվա կտրվածքով կարող է ընդունել մինչ վեց հեռանկարային և խոստումնալից պատանի ֆուտբոլիստների, բայց եթե նրանց թիվն ավելանա, կարող են մեկնել նաև ավելի մեծ թվով պատանի մարզիկներ։
Սևան Կարիանի հավաստմամբ` իրենք սկզբում ցանկանում են ամուր հիմք ստեղծել, որի վրա հետագայում կհիմնվի պրոֆեսիոնալ ակումբ `իր կազմում ունենալով թրծված ու ֆոուտբոլային թեժ մրցակցության պատրաստ սեփական կադրեր։
Հայաստանի ազգային հավաքականի նախկին անդամ, «Լանս» ակումբի ակադեմիայի տնօրեն և համատեղության կարգով «Սարդարապատի» տեխնիկական տնօրեն Էրիկ Ասադուրյանն իր խոսքում հատուկ ուշադրություն դարձրեց պատանի ֆուտբոլիստների ընտրության մեթոդաբանությանը` շեշտելով, որ յուրաքանչյուր ֆուտբոլիստի պարագայում պետք է ցուցաբերվի անհատական մոտեցում։
«Առաջին հայացքից պատանին կարող է լինել փոքրամարմին, կարճահասակ, կարող է որոշ պարամետրերով զիջել ֆիզիկապես ուժեղ թիմակիցներին, բայց կարող է ունենալ որոշակի ներուժ, որը պետք է բացահայտել և նպաստել այդ պատանու հետագա զարգացմանը։ Նրանց անհրաժեշտ է հետևել ամեն օր, տրամադրել աշխատանքի, իրականացնել նաև հոգեբանական աշխատանք` մղելով հաղթանակների»,– ասաց Ասադուրյանը։
«Սարդարապատի» և «Լանսի» միջև համագործակցության ծրագիրը կրում է երկարաժամկետ բնույթ։ Ասադուրյանն ասաց, որ Ֆրանսիա վերադառնալուց հետո չի դադարեցնի պատանի ֆուտբոլիստներին հետևելու գործընթացը։ Հայաստանից Ֆրանսիա կուղարկվեն մարզումների և ինտենսիվ պարապմունքների տեսագրությունները, որոնք նույնպես կօգնեն հայտնաբերել խոստումնալից պատանիներին։
Էրիկ Ասադուրյան
© Sputnik / Asatur Yesayants
Հավելենք, որ ծրագրի շրջանակում անցյալ տարի նոյեմբերին երկու պատանի ֆուտբոլիստ և երկու մարզիչ են մեկնել Ֆրանսիա։