ԵՐԵՎԱՆ, 12 մայիսի – Sputnik. ԱՄՆ-ն մտադիր չէ միջամտելու Թուրքիայի առաջիկա նախագահական ընտրություններին և կարծում է, որ Թուրքիայի ժողովուրդ պետք է ինքնուրույն որոշի իր ապագան։ Այս հայտարարությունն է արել Սպիտակ տան ազգային անվտանգության խորհրդի ռազմավարական հաղորդակցության համակարգող Ջոն Քիրբին։
«Թուրք ժողովրդին հնարավորություն կտանք անձամբ որոշել սեփական ապագան։ Բնականաբար մենք չենք միջամտում ընտրությունների քննարկումներին, առավել ևս չենք բանավիճում կոնկրետ թեկնածուների մասին։ Դա պետք է որոշի թուրք ժողովուրդը։ Թուրքիայում ժողովրդավարական ավանդույթ կա, ինչը մենք հարգում ենք», – ասել է Քիրբին։
Այսօր ավելի վաղ Թուրքիայի ՆԳՆ ղեկավար Սուլեյման Սոյլուն մեղադրել էր ԱՄՆ-ին հանրապետության ընտրություններին միջամտելու համար։
Թուրքիայում համընդհանուր նախագահական և խորհրդարանական ընտրությունները նախանշված են մայիսի 14-ին։ Եթե թեկնածուներից ոչ մեկը չհաղթահարի 50%–ի շեմը, նախագահական ընտրությունների երկրորդ փուլը կանցկացվի մայիսի 28-ին։