ԵՐԵՎԱՆ, 11 մայիսի – Sputnik. Երևանի Էրեբունի վարչական շրջանի Արցախի պողոտայից լքված նորածին երեխա են գտել։ Տեղեկությունը Sputnik Արմենիային հայտնեցին ՀՀ ներքին գործերի նախարարության մամուլի ծառայությունից։
«Շտապօգնության աշխատակիցներն են գտել։ Դեպքի մասին 15։55–ին հաղորդում ենք ստացել, որ Արցախի պողոտայի 8/4 հասցեում կիսամերկ վիճակում նորածին երեխա է հայտնաբերվել, որին բժիշկները հիվանդանոց են տեղափոխել»,– նշեցին ոստիկանությունից։
shamshyan.com–ն էլ հայտնում է, որ երեխային հայտնաբերել են կիսախարխուլ շինությունում` ժողովրդին հայտնի մուրացկանների կացարանից։
«Երեխան հիվանդանոց է տարվել ծայրահեղ ծանր վիճակում, հիպոթերմիա, մարմնի ցածր ջերմաստիճանով: Երեխան աղջիկ է»,– հայտնում է կայքը։
Փոքրիկին հայտնաբերել է 1988 թվականին ծնված Երևանի մի բնակիչ։
Ոստիկանները մեկնել են այն տարածք, որտեղից բնակիչը հայտնաբերել է նորածնին։ Լուսանկարից երևում է, որ այնտեղ մարդ է ապրել` կա ներքնակ, ծածկոց։
Երեխան ողջ է, այժմ նա բժիշկների հսկողության տակ է։
Ոստիկանությունը համապատասխան նյութերն ուղարկել է քննչական կոմիտե։