ԵՐԵՎԱՆ, 10 մայիսի – Sputnik. Երևանի նախկին քաղաքապետ, ՀՀ վարչապետի խորհրդական Հրաչյա Սարգսյանը «Նեմեսիս» գործողության հերոսներին նվիրված աղբյուր–հուշակոթողի մասին չի ասել ՀՀ վարչապետ Նիկոլ Փաշինյանին Երևանի նախկին քաղաքապետն այդ մասին հայտնել է լրագրողներին։
Երևանի օղակաձև զբոսայգում «Նեմեսիս» գործողության հերոսներին նվիրված աղբյուր–հուշակոթողը տեղադրելու որոշումը կայացվել է 2021 թվականի սեպտեմբերի 14-ին։ Այդ ժամանակ Երևանի քաղաքապետն էր Հայկ Մարությանը, Սարգսյանն էլ առաջին փոխքաղաքապետն էր։
«Իհարկե, տեղյակ եմ եղել արձանի տեղադրման որոշման մասին։ Կարծում եմ, որ դա պատմական փաստ է, և դա ինչ–որ ձևով արձանագրվել է։ Հիմա Թուրքիայի կառավարության կողմից պետք է ստիպեն, որպեսզի մեր դասագրքերից այդ տեղեկությունը հանե՞նք։ Ծիծաղելի է։ Կարծում եմ` իրենք չպետք է խառնվեն մեր ներքին գործերին»,– ասել է Սարգսյանը։
Հիշեցնենք` «Նեմեսիս» գործողության հերոսներին նվիրված աղբյուր–հուշակոթողը բացվեց ապրիլի 25-ին։ Դրանից մի քանի օր հետո Թուրքիան փակեց իր օդային տարածքը հայկական ավիաընկերությունների համար։ Այդ երկրի արտգործնախարար Մևլութ Չավուշօղլուն էլ պահանջեց ապամոնտաժել հուշարձանը։
ՀՀ վարչապետ Նիկոլ Փաշինյանն ավելի ուշ հայտարարեց, որ «Նեմեսիսի» հուշարձանի վերաբերյալ սխալ որոշում է կայացվել։