ԵՐԵՎԱՆ, 10 մայիսի, Sputnik -Խաչիկ Չախոյան. Ուզբեկստանի մայրաքաղաք Տաշքենդում ընթացող բռնցքամարտի աշխարհի առաջնությունում քառորդ եզրափակիչում՝ մրցումային տասներորդ օրը ռինգ դուրս եկավ Նարեկ Մանասյանը, որը 92կգ քաշային կարգում մրցեց իսպանացի Էմանուել Ռեյես Պլայի հետ։
Առաջին ռաունդում շատ լարված պայքար ընթացավ։ Երկու բռնցքամարտիկներն էլ շատ զգույշ էին գործում, բայց այնուամենայնիվ երկկողմանի արդյունավետ հարվածներ գրանցվեցին։ Մրցավարները առաջին ռաունդում առավելությունը տվեցին իսպանացի մարզիկին։
Երկրորդ ռաունդում հիմնականում մարտը ընթացավ կարճ տարածության վրա։ Հաճախ բռնցքամարտիկներն անցնում էին նաև մերձամարտի։ Այսպիսի պայմաններում առավելություն ստացավ Մանասյանը, որը երկրորդ ռաունդում հաղթեց 4։1 հաշվով։
Վճռորոշ երրորդ ռաունդում Մանասյանը անընդհատ առաջ գնալով ճնշում էր մրցակցին, նախաձեռնությունը հայ բռնցքամարտիկի կողմն էր։ Ռեյեսը շարունակում էր պայքարել ու փորձում դիմավորել մեր բռնցքամարտիկին դիպուկ հարվածներով։ Բայց Նարեկի առավելությունը մասնավորապես մերձամարտում տվեց իր արդյունքը։ Հաղթանակը մենամարտում 4։0 հաշվով շնորհվեց հայ բռնցքամարտիկին։ Այսպիսով՝ Հովհաննես Բաչկովից հետո Մանասյանը նույնպես ապահովեց աշխարհի առաջնության առնվազն բրոնզե մեդալը։
Քառորդ եզրափակիչում մեր մարզիկներից մնաց Ռաֆայել Հովհաննիսյանը, որ երեկոյան մրցահերթում 86 կգ քաշային կարգում կիսաեզրափակիչի ուղեգիրն է վիճարկելու վրացի Գեորգի Կուշիտաշվիլիի հետ։
Հիշեցնենք, որ Հայաստանի հավաքականը Տաշքենդ է մեկնել 11 բռնցքամարտիկով։ Բարեղամ Հարությունյանը (48 կգ), Ռուդոլֆ Գարբոյանը (51 կգ), Ռուսլան Ասլիկյանը (54կգ), Արթուր Բազեյանը (57 կգ), Արթուր Ղազարյանը (60 կգ), Գուրգեն Մադոյանը (67կգ), Համբարձում Հակոբյանը (80 կգ) և Դավիթ Չալոյանը (92+ կգ) արդեն պարտվել ու լքել են մրցաշարը։