ԵՐԵՎԱՆ, 9 մայիսի – Sputnik. Ռուսաստանը շատ լրջորեն է վերաբերվում Հայաստանում առկաիրավիճակին, ՀՀ–իհանդեպ իր դաշնակցային պարտավորություններին և ամեն ջանք գործադրում է, որպեսզի երկրում խաղաղության, անվտանգության և զարգացման դարաշրջան հաստատվի։ Այս մասին «Հաղթանակ» զբոսայգում լրագրողների հետ զրույցում ասաց ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը։
Նրա խոսքով` Մոսկվան աջակցում է բոլոր այն ջանքերին որոնք ուղղված են Հարավային Կովկասում իրավիճակի կայունացմանը, խաղաղության և կայունության հաստատմանը։
«Մեր կարծիքով` այսօր այդ ջանքերը, որոնց մասին խոսել է ՌԴ նախագահի մամուլի քարտուղարը, պետք է նպաստեն եռակողմ պայմանավորվածությունների իրականացմանը, որոնք ամրագրվել են երեք երկրների ղեկավարների կողմից` եռակողմ հայտարարությամբ»,- ասել է Կոպիրկինը։
Դեսպանն ընդգծել է, որ դա Ռուսաստանի սկզբունքային և հայեցակարգային դիրքորոշումն է, և դրա հիման վրա է, որ աշխատանքներ են տարվում, ակտիվ ջանքեր են գործադրվում գործընթացն առաջ տանելու համար։
Կոպիրկինը նշել է, որ Մոսկվան հենց այդպես է տեսնում բոլոր այն երաշխիքները, որոնց դեպքում էսկալացիա չի լինի, և կողմերը կգան համաձայնության, որը կբխի Հարավային Կովկասի բոլոր երկրների ու ժողովուրդների շահերից։
«Մենք մշտապես կապի մեջ ենք կողմերի հետ և ակտիվորեն առաջ ենք տանում խաղաղության օրակարգը` տրամադրելով միջնորդական ծառայություններ։ Հուսով ենք` շուտով հանդիպում կկայանա Մոսկվայում»,- ասել է նա։
Դիվանագետն ընդգծել է, որ ռուսական խաղաղապահ զորախումբն աշխատում է Լեռնային Ղարաբաղում, ջանքեր է գործադրում և լուծում իր առջև դրված առաջադրանքները, չնայած խնդիրներին` օգնում է կարգավորել իրավիճակը, այդ թվում՝ Լաչինի միջանցքի բացման ուղղությամբ։
Նա կրկին նշել է, որ կողմերի հետ աշխատանքներ են տարվում կարգավորման բոլոր ձևաչափերով աշխատանքին խթան տալու համար, եռակողմ խումբն էլ աշխատանքներ է տանում տարածաշրջանում տնտեսական և տրանսպորտային հաղորդակցությունների ապաշրջափակման, խաղաղության պայմանագրի կնքման և սահմանների սահմանազատման ուղղությամբ: