ԵՐԵՎԱՆ, 8 մայիսի – Sputnik. Իրանը պատրաստ է Սիրիայի ԶՈւ–ին պաշտպանության համար զինել ամենաժամանակակից զենքով։ Այս մասին Իրանի պաշտպանության նախարար, բրիգադի գեներալ Մոհամադ Ռեզա Աշտիանին հայտարարել է սիրիացի գործընկեր, գեներալ–մայոր Ալի Մահմուդ Աբասի հետ հանդիպմանը։
«Այսօր տարբեր ոլորտներում Սիրիայի վերականգնման դարաշրջան է, ԻԻՀ–ի պաշտպանության նախարարությունը պատրաստ է արտադրել և ՍԱՀ–ին զինել ամենաժամանակակից սպառազինությամբ», – Tasnim–ի փոխանցմամբ` ասել է Աշտիանին։
Իրանի նախարարը սիրիական ժողովրդի անվտանգության մակարդակի բարձրացման նպատակով Սիրիայի հետ համագործակցելու պատրաստակամություն է հայտնել պաշտպանական և բազմանպատակային ենթակառուցվածքների ստեղծման, արաբական հանրապետության հզորությունը (զենքի հարցում) ամրապնդելու համար գործարանների կառուցման և ռազմավարական պաշտպանական արտադրանքի արտադրական հոսքերի գործարկման ոլորտներում։
Ավելի վաղ Իրանի ԱԳՆ պաշտոնական ներկայացուցիչ Նասեր Քանանին հայտարարել էր, որ Սիրիայի մասնակցության վերականգնումը Արաբական պետությունների լիգայի գործունեության մեջ նպաստում է տարածաշրջանում կայունություն հաստատելուն և նրա խնդիրներին օտարերկրյա միջամտությունը նվազեցնելուն։
Արաբական պետությունների լիգայի ԱԳՆ ղեկավարները մայիսի 7-ին արտահերթ հանդիպման ընթացքում հավանություն են տվել շուրջ 12 տարվա դադարից հետո Սիրիայի վերադարձին տարածաշրջանային կազմակերպություն։