Հայ դպրոցականները երկու մեդալ են նվաճել Մենդելեևյան միջազգային օլիմպիադայում

ԵՐԵՎԱՆ, 8 մայիսի – Sputnik. «Քիմիա» առարկայի Մենդելեևյան 57-րդ միջազգային օլիմպիադայում հայ դպրոցականները նվաճել են 1 արծաթե և 1 բրոնզե մեդալ։ Տեղեկությունը հայտնում է ՀՀ կրթության, գիտության, մշակույթի և սպորտի նախարարությունը։

Մրցույթին մասնակցել է 21 երկրի 113 ներկայացուցիչ։ Այն անցկացվել է Ղազախստանի մայրաքաղաք Աստանայում ապրիլի 30-ից մայիսի 6-ը։

Հայաստանի թիմը ներկայացրել են «Քվանտ» վարժարանի 12-րդ դասարանի աշակերտներ Լեոնիդ Ասատրյանը և Յուրի Պետրոսյանը, Գյումրու «Ֆոտոն» վարժարանի 12-րդ դասարանի աշակերտ Տիգրան Մխիթարյանը և Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցի 10-րդ դասարանի աշակերտ Արման Խառատյանը։

Թիմը ղեկավարել է ԵՊՀ քիմիայի ֆակուլտետի դեկանի տեղակալ, դոցենտ, ք․գ․թ․ Արմեն Գալստյանը։

Հիշեցնենք, որ նախորդ՝ 56-րդ օլիմպիադայում, որը առկա ձևաչափով անցկացվել էր Ուզբեկստանի մայրաքաղաք Տաշքենդում, Լեոնիդ Ասատրյանը կրկին նվաճել էր արծաթե մեդալ, իսկ «Հերացի» ավագ դպրոցի աշակերտ Հայկ Աղեկյանը՝ բրոնզե մեդալ:

Հավելենք, որ Մենդելեևյան միջազգային օլիմպիադաներում Հայաստանի թիմերն ընդհանուր առմամբ արժանացել են 41 մեդալի (1 ոսկե, 7 արծաթե և 33 բրոնզե):