ԵՐԵՎԱՆ, 8 մայիսի – Sputnik. Ռուսաստանի ՊՆ-ն Հաղթանակի օրվան նվիրված «Հայրենիքը պաշտպանության է կանչել իր զավակներին» խորագրով մուլտիմեդիոն նախագիծ է գործարկել։ Այստեղ ներկայացված են Հայրենական մեծ պատերազմի ժամանակ ռազմաճակատ մեկնած բազմանդամ ընտանիքների անդամների մասին պատմող արխիվային փաստաթղթեր։
«Հայրենական մեծ պատերազմի մեկնարկով խորհրդային միլիոնավոր մարդիկ մասնակցեցին մեր երկրի պաշտպանությանը։ Հայրենիքի կանչով յուրաքանչյուր ընտանիքից կամավոր ռազմաճակատ էին գնում պաշտպանները, երբեմն ամբողջ ընտանիքով` որդիներ, եղբայրներ, հայրեր և պապեր։ Շատ ընտանիքներից հերթով ռազմաճակատ էին գնում բոլոր որդիները։ Հազվադեպ չէին դեպքերը, երբ հարազատ եղբայրները մարտնչում էին նույն ստորաբաժանումում մի մարտի դաշտում, բայց առավել հաճախ նրանք կռվում էին տարբեր ճակատներում, նրանց միջև հարյուրավոր և հազարավոր կիլոմետրեր էին», – հայտնում է ՌԴ ՊՆ–ն։
Հրապարակվում են Ռուսաստանի Դաշնության պաշտպանության նախարարության կենտրոնական արխիվի ֆոնդերից վերցված փաստաթղթեր, այդ թվում պարգևատրման նյութեր Բեկմուրզով, Հադզանով, Վոլոդիչկին, Լիսենկո, Մունկաև, Ստեպանով, Կուպրիյանով, Ֆրոլով և այլ հերոս եղբայրների մասին։
«Ոչ բոլորն են վերադարձել մարտի դաշտից։ Հայրենիքի, իրենց ընտանիքների առաջ նրանք իրենց որդիական պարտքը կատարել են լիարժեք», – նշում է ՌԴ ՊՆ-ն։
Ընդգծվում է, որ խորհրդային զինվորների հերոսության մասին Ռուսաստանի Դաշնության պաշտպանության նախարարության կենտրոնական արխիվի ֆոնդերից արխիվային նյութերի հրապարակումն ուղղված է նացիզմի և ֆաշիստական Գերմանիայի դեմ հաղթանակ տարած Խորհրդային Միության ժողովուրդների մեծ սխրանքի մասին պատմական ազգային հիշատակը պահպանելուն։