ԵՐԵՎԱՆ, 8 մայիսի – Sputnik. ԲՀԿ առաջնորդ Գագիկ Ծառուկյանը պնդում է` եթե ընտրակաշառք բաժանելու գործով մեղավոր լիներ, կընդուներ մեղքը։ Այս մասին նա խոսեց Հակակոռուպցիոն դատարանի մոտ լրագրողների հետ ճեպազրույցում։
«Եթե ես մեղավոր լինեի, վաղեմության ժամկետը վաղուց անցել է, կհամաձայնեի, վաղեմության ժամկետի անցած լինելու հիմքով գործը կկարճվեր»,– լրագրողների հետ ճեպազրույցում նշեց ԲՀԿ առաջնորդը։
Նա հավելեց` եթե ինչ–որ գյուղերում ինչ–որ մարդիկ գումար են բաժանել, ապա ինքը ի՞նչ կապ ունի դրա հետ` շեշտելով, որ մեղքը չի ընդունում։
Հիշեցնենք` «Բարգավաճ Հայաստան» կուսակցության նախագահ Գագիկ Ծառուկյանին և «Մուլտի գրուպ կոնցեռն» ՍՊԸ-ի տնօրեն Սեդրակ Առուստամյանին մեղադրանք է առաջադրվել նախկին Քրեական օրենսգրքի 154.2-րդ հոդվածի 2-րդ մասով (ընտրողներին կաշառք տալը)։
2023 թվականի ապրիլի 21-ին հսկող դատախազի կողմից հաստատված մեղադրական եզրակացությունը վարույթի նյութերի հետ հանձնվել է Հակակոռուպցիոն դատարան: