ԵՐԵՎԱՆ, 6 մայիսի – Sputnik. Շիրակի մարզպետարանում կառուցվածքային փոփոխությունների են պատրաստվում։ Մի քանի ստորաբաժանումներ միավորվելու են, կրճատումներ լինելու են, բայց ոչ մեծ ծավալի։ Լրագրողների հետ զրույցում տեղեկությունը հայտնեց Շիրակի մարզպետ Մուշեղ Մուրադյանը։
Դեռ 2022 թվականին վարչապետ Նիկոլ Փաշինյանը որոշում է ընդունել, ըստ որի` ՀՀ բոլոր մարզպետարաններում իրականացվելու են կառուցվածքային փոփոխություններ, մասնավորապես` մի քանի բաժիններ միավորվելու են։
«Մենք այսօր ունենք նաև թափուր հաստիքներ, որոնք չենք համալրվում, և այս դեպքում հնարավոր կլինի թափուր պաշտոնը համալրել ներքին տեղափոխությամբ։ Իսկ կառուցվածքային փոփոխությունները կլինեն ստորաբաժանումների վերամիավորմամբ»,- նշեց մարզպետը։
Նրա խոսքով` աշխատակիցներին դեռ ծանուցումներ չեն ուղարկվել։ Գործընթացը մեկնարկել է մարտի 1-ին և պետք է ավարտվի հունիսի 1-ին։ Հիմա դեռ իրավակարգավորման փուլում են։
Մուրադյանը շեշտեց` մարզպետարաններում կառուցվածքային փոփոխություններն աշխատանքի որակի բարձրացմանն են միտված։
Շիրակի մարզպետարանի գլխավոր քարտուղար Արսեն Աբրահամյանը ավելի վաղ Sputnik Արմենիայի հետ զրույցում տեղեկացրել էր, որ մարզպետարանում 14 ստորաբաժանումների փոխարեն գործելու են 10-ը, այսինքն` 7 ստորաբաժանումներ միավորվելու են, դրանց փոխարեն 3–ն է ձևավորվելու: Նա նաև հավելել էր, որ ըստ կանոնադրության` աշխատակիցների առավելագույն թիվը 132 է։ Այդ որոշումը չի փոխվել, նշանակում է կառուցվածքային փոփոխությունն աշխատողների կրճատմամբ չի ուղեկցվելու, բայց հնարավոր է` վարչության կամ բաժինների պետերի հաստիքների փոփոխություն լինի, և նրանց այլ պաշտոններ առաջարկվեն։
Հիշեցնենք, որ կառուցվածքային փոփոխությունները բոլոր մարզպետարաններին են վերաբերում։ ՀՀ կառավարության որոշման համաձայն` միավորվում են մարզպետարանի քաղաքաշինության վարչությունն ու հողօգտագործման բաժինը, առողջապահության և սոցիալական ապահովության վարչությունը և ընտանիքի, երեխաների և կանանց իրավունքների պաշտպանության բաժինը, միավորվում են նաև քարտուղարությունը, տեղեկատվության ու հասարակայնության հետ կապերի և անձնակազմի կառավարման բաժինները: