ԵՐԵՎԱՆ, 6 մայիսի – Sputnik. Ուկրաինայի տարածքում գործող արևմտյան կենսալաբորատորիաների աշխատանքը կարող էր անհրաժեշտ լինել կենսաբանական զենքի ստեղծումը կոծկելու համար։ ՌԻԱ Նովոստիի հետ զրույցում այս տեսակետն է հայտնել ՌԴ քննչական կոմիտեի նախագահ Ալեքսանդր Բաստրիկինը։
Նրա խոսքով` կենսաբանական զենքի մշակումը, արտադրությունն ու պաշարների կուտակումն արգելելու մասին կոնվենցիան սահմանում է, որ անդամ պետությունները պարտավորվում են միջոցներ ձեռնարկել իրենց տարածքում նման զենքն արգելելու համար։
Սակայն բակտերիաների և վիրուսների կիրառմամբ միկրոկենսաբանության ոլորտում աշխատանք տանելը կարող է երկակի նշանակություն ունենալ` դեղամիջոցների մշակում և կենսաբանական զենքի բաղադրիչների ստեղծման համար վտանգավոր ինֆեկցիաների կիրառում։
Մոնիտորինգի համար որոշակի մեխանիզմ կա, որը ենթադրում է, որ կոնվենցիայի մասնակից երկրները պարբերաբար տեղեկություններ են տրամադրում այն մասին, թե ինչ լաբորատորիաներ են գործում իրենց տարածքում և ինչ հզորություններ են կիրառվում ուսումնասիրություններում։
«Սակայն եթե մի երկիր մյուսների տարածքն օգտագործում է այդ ոլորտում ուսումնասիրություններ իրականացնելու համար, նման պահվածքը կարող է ընկալվել որպես մոնիտորինգի գործող ընթացակարգերի շրջանցման ցանկություն և քողարկել իրական նպատակներն ու սեփական գործունեության արդյունքները։ Քննչական կոմիտեն քրեական գործի շրջանակում շարունակում է վերլուծել դրա հետ կապված առկա տեղեկությունները», – ասել է Բաստրիկինը` պատասխանելով հարցին, թե արդյոք արևմտյան երկրները կարող էին Ուկրաինայում գործող լաբորատորիաներում կենսաբանական զենք մշակել։
Ապրիլի 12-ին ՌԴ Դաշնային խորհուրդը միաձայն հաստատեց Ուկրաինայում ԱՄՆ կենսալաբորատորիաների գործունեությունը հետաքննող խորհրդարանական հանձնաժողովի զեկույցը։ Պետդուման հավանություն է տվել փաստաթղթին։