ԵՐԵՎԱՆ, 5 մայիսի – Sputnik. ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանն իրեն անվստահություն հայտնելու գործընթացը քաղաքական ճնշում է համարում։ Այս մասին Թովմասյանն ասել է ԱԺ-ում լրագրողների հետ զրույցում։
Ավելի վաղ Թովմասյանին անվստահություն հայտնելու գործընթաց սկսելու մասին հայտարարել էր ՔՊ–ական պատգամավոր Հովիկ Աղազարյանը։ Հիմքն այն է, որ հանձնաժողովում ՄԻՊ թեկնածուների հարցի քննարկման ժամանակ Թովմասյանն ընդմիջում չի հայտարարել, երբ իշխանական պատգամավորների և Էդգար Ղազարյանի միջև լեզվակռիվ է առաջացել, և չի հորդորել Էդգար Ղազարյանին ներողություն խնդրել 2018 թվականի իշխանափոխությունը ադրբեջանա-թուրքական անվանելու համար։
Թովմասյանը վստահ է` «Քաղաքացիական պայմանագիր» խմբակցության պատգամավորների մոտ հատուկ սովորություն է դարձել ստելը։ Հովիկ Աղազարյանը ստել է, որովհետև ես 2 անգամ ասում եմ Էդգար Ղազարյանին՝ ներողություն խնդրեք այդ խոսքի համար։
«Իրենք քաղաքական ճնշում են գործադրում ինձ վրա, դա քաղաքական որոշում է։ Այդ օրը 4 պատգամավոր խոսում էին ինձ անվստահություն հայտնելու մասին, բնականաբար, հստակ դիրքորոշումով։ Առաջինն ասաց Հովիկ Աղազարյանը, դեռ նիստը չսկսած, ասաց` եթե նիստը չվարեմ ինչպես հարկն է, ապա անվստահություն կհայտնի։ Հետո՝ Արթուր Հովհաննիսյանն էլ բաղվում էր, խանգարում, բայց ասում էր, որ չեմ կարողանում նիստը վարել, ու պետք է ինձ անվստահություն հայտնելու հարցը բարձրացնեն։ Հաջորդիվ նույնն ասացին նաև Ռուստամ Բաքոյանը, Վլադիմիր Վարդանյանը»,- ասաց Թովմասյանը։
Նա հիշեցրեց նաև նիստի այն հատվածները, երբ Արթուր Հովհաննիսյանը քաշքշում էր Էդգար Ղազարյանին, սպառնում ականջ ու լեզու կտրել, և իրենց հայտնել են, որ դրանում հանցակազմ չկա։ Նա աբսուրդ համարեց այն, որ պատգամավորը սպառնում է դիմացինի մարմին մասերը կտրել և շարունակում է պաշտոնավարել։
Թագուհի Թովմասյանի խոսքով՝ եթե իրեն պաշտոնանկ անեն, ընդդիմությունը թեկնածու չի առաջադրի, հանձնաժողովի նախագահի պաշտոնը կմնա թափուր։