ԵՐԵՎԱՆ, 4 մայիսի – Sputnik. Կրեմլի վրա հարձակումից հետո պատասխան քայլերը կարող են լինել բացառապես հավասարակշռված և ռուսական շահերին համապատասխանող: Լրագրողների հետ զրույցում այս հայտարարությունն է արել ՌԴ նախագահի մամուլի քարտուղար Դմիտրի Պեսկովը։
«Բնականաբար, ես ձեզ մանրամասներ չեմ կարող ներկայացնել։ Ամեն դեպքում կարող է խոսք լինել միայն մտածված, հավասարակշռված և մեր երկրի շահերին համապատասխանող քայլերի մասին»,- ասել է Պեսկովը։
ՌԴ նախագահի մամուլի քարտուղարի խոսքով` Կրեմլի վրա անօդաչուներով հարձակման փորձից հետո անվտանգության համակարգերը կուժեղացվեն, ընդ որում` դրանք առանց այդ էլ ուժեղացված ռեժիմով են աշխատում Հաղթանակի շքերթին նախապատրաստվելու համատեքստում:
Պեսկովն ընդգծել է նաև, որ որոշումները, նպատակների և միջոցների սահմանումը այնպիսի դեպքերում, ինչպիսիք են Ռուսաստանի նախագահի Կրեմլի նստավայրի վրա ԱԹՍ-ների հարձակումը, Վաշինգտոնից են թելադրվում Կիևին:
«Անկասկած։ Նման որոշումները, նպատակների սահմանումը և այլն այս ամենը Կիևին թելադրված է Վաշինգտոնից։ Եվ մենք լավ գիտենք այդ մասին»,-ասել է Պեսկովը` պատասխանելով այն հարցին, թե արդյոք Վաշինգտոնն է կանգնած ՌԴ նախագահ Վլադիմիր Պուտինի Կրեմլի նստավայրի վրա անօդաչուների հարձակման հետևում։
Ավելի վաղ Կրեմլի մամուլի ծառայությունից հայտնել էին, որ մայիսի 3-ի գիշերը Կիևի ռեժիմը փորձել է անօդաչու թռչող սարքերով հարվածել ՌԴ նախագահ Վլադիմիր Պուտինի կրեմլյան նստավայրին, երկու սարք շարքից հանվել է:
Տուժածներ և նյութական վնասներ չկան։ Նախագահի մամուլի քարտուղար Դմիտրի Պեսկովն ավելի ուշ հայտնել էր, որ պետության ղեկավարն այդ պահին Կրեմլում չի եղել: ՌԴ քննչական կոմիտեն ահաբեկչության հոդվածով գործ է հարուցել։