ԵՐԵՎԱՆ, 3 մայիսի – Sputnik. Օրենսդիր ու գործադիր թևի հետ հանդիպումների ժամանակ ՀՀ-ում Եվրամիության պատվիրակության ղեկավար, դեսպան Անդրեա Վիկտորինը մտահոգություն է հայտնել ԱԺ Մարդու իրավունքների պաշտպանության հանձնաժողովի նախագահ Թագուհի Թովմասյանի դեմ իրականացվող գործողությունների վերաբերյալ: Այս մասին գրում է «Հրապարակը»։
«Վիկտորինը Նիկոլ Փաշինյանին և նրա որոշ թիմակիցների ասել է, որ սարսափելի էին կադրերը, թե ինչպես էին թիկնապահները խորհրդարանում խաղաղ ակցիա իրականացնող Թովմասյանին հեռացնում բռնությամբ այն դեպքում, երբ նա ընդունելի ֆորմատով ակցիա էր անում` որևէ վիրավորանք չէր հնչեցնում»,–գրում է թերթը:
Դեսպանն ասել է, որ Թովմասյանը միակ ընդդիմադիր պաշտոնյան է այժմ ՀՀ Ազգային ժողովում, որին պաշտոնից հեռացնելու դեպքում ժողովրդավարությունը խիստ կտուժի:
Այսինքն՝ խորհրդարանը կազմված կլինի միայն ՔՊ-ից, իշխանությունը թեկուզ ձևական կվերացնի բազմակարծությունը:
«ԵՄ դեսպան Վիկտորինը, որ Նիկոլ Փաշինյանի նկատմամբ միշտ բարյացակամ է տրամադրված, բարեկամաբար խորհուրդ է տվել Թագուհի Թովմասյանի պաշտոնանկության հարց չբարձրացնել և նրան չհեռացնել պաշտոնից: Իշխանության ներսում, մեր տեղեկություններով, հիմա ծանրութեթև են անում՝ լսե՞լ դեսպանի հորդորը, թե՞, այդուհանդերձ, շարժվել սեփական օրակարգով»,–գրում է թերթը։
Հիշեցնենք` մարտի 20–ին ԱԺ արտահերթ նիստում մտքերի փոխանակության ժամանակ իր ելույթից հետո Թովմասյանը հայտարարեց, որ չի իջնելու ամբիոնի մոտից, որպեսզի այդ հարթակից այլևս սուտ չհնչի։ ԱԺ նախագահ Ալեն Սիմոնյանը հորդորեց նրան դադարեցնել ակցիան, Թովմասյանը չհամաձայնեց, նրան միացան այլ ընդդիմադիր պատգամավորներ։ Ներս հրավիրվեցին անվտանգության աշխատակիցները, քաշքշուկ սկսվեց։ Արդյունքում անվտանգության աշխատակիցները դուրս բերեցին «Պատիվ ունեմ» և «Հայաստան» խմբակցությունների պատգամավորների մի մասին։