ԵՐԵՎԱՆ, 3 մայիսի – Sputnik. ՀՀ Լոռու մարզի Ամրակից գյուղի Սուրբ Նիկոլայ Հրաշագործ եկեղեցին (ռուսական ուղղափառ) այս տարի կվերանորոգվի, և դրա համար պահանջվելու է մոտ 170 մլն դրամ։ Ազգային ժողովում կառավարության հետ հարցուպատասխանի ժամանակ այս հայտարարությունն արեց ՀՀ կրթության, գիտության, մշակույթի և սպորտի նախարար Ժաննա Անդրեասյանը` պատասխանելով «Քաղաքացիական պայմանագիր» խմբակցության պատգամավոր Ալեքսեյ Սանդիկովի (Հայաստանում ռուսական համայնքի ներկայացուցիչ) հարցին։
Նշենք, որ դեռ նախորդ տարի եկեղեցու նախագծման աշխատանքների համար կառավարությունը 10 մլն դրամ էր հատկացրել։
«Նախագիծն արդեն արվել է, անցել է նաև գիտամեթոդական հանձնաժողովի քննարկումը, որոշ առաջարկներ են եղել լրամշակման հետ կապված։ Նախագիծն այս պահին նաև պարզ և համալիր փորձաքննություն պետք է անցնի, որը 2-3 ամիս կտևի, այնուհետև կհայտարարվի վերականգնման մրցույթը։ Մոտ 170 մլն դրամ կպահանջվի այդ եկեղեցու ամրակայման, վերականգնման համար։ Դա արդեն իսկ պլանավորել ենք բյուջետային հայտով և միջնաժամկետ ծախսային ծրագրով»,– նշեց Անդրեասյանը։
Նրա խոսքով` մրցույթի արդյունքներից կախված` արժեքը կարող է փոխվել։ Նախարարը հույս հայտնեց, որ հնարավոր կլինի արագ ժամկետներում վերակառուցել եկեղեցին։