Եվրոպայի երիտասարդական առաջնությունում Գոռ Ազիզյանը արծաթե մեդալ նվաճեց

ԵՐԵՎԱՆ, 3 մայիսի - Sputnik. Գոռ Ազիզյանը արծաթե մեդալ է նվաճել Երևանում ավարտին մոտեցող բռնցքամարտի Եվրոպայի երիտասարդական առաջնությունում:

57 կգ քաշային կարգում Հայաստանի ներկայացուցիչը եզրափակիչում 4:0 հաշվով պարտվեց Բուլղարիան ներկայացնող Կոնստանտին Յորդանո Կոստովին:

Վազգեն Բադալյանի գլխավորած հավաքականից Եվրոպայի առաջնության եզրափակիչում ոսկե մեդալի համար կպայքարեն նաև Աղվան Ալեքսանյանը (80 կգ) և Դավիթ Սիմոնյանը (86 կգ)։

Հիշեցնենք, որ Վազգեն Բադալյանի գլխավորած հավաքականից բրոնզե մեդալակիրներ են դարձել Հովհաննես Հարությունյանը (48 կգ), արցախցի Էրիկ Առստամյանը (54 կգ), Արթուր Մկրտչյանը (63,5 կգ), Յուրա Բաբլումյանը, Արման Միսկարյանը (71 կգ) , Արմեն Պողոսյանը (75կգ), Իշխան Հովսեփյանը (92 կգ) և Ալբերտ Հարությունյանը (92 +կգ):

Բռնցքամարտի Եվրոպայի երիտասարդական առաջնությունը մեկնարկել է Երևանում ապրիլի 25-ին և կշարունակվի մինչև մայիսի 3-ը: Առաջնությանը մասնակցում են ավելի քան 30 երկրի շուրջ 500 մարզիկներ: