ԵՐԵՎԱՆ, 2 մայիսի – Sputnik. 2022թ–ի ընթացքում ՏՏ ոլորտի կշիռը Հայաստանի ՀՆԱ–ի մեջ քառապատկվել է։ Այսօր կայացած մամուլի ասուլիսում տեղեկությունը հայտնեց ՀՀ ԿԲ նախագահ Մարտին Գալստյանը` ներկայացնլով տնտեսության աճի հիմնական ուղղությունները։
«Մենք տեսնում ենք, որ ոչ ռեզիդենտները, ովքեր գալիս են Հայաստան աշխատելու, ստանում են բավականին բարձր աշխատավարձ»,– ասաց Գալստյանը` նշելով, որ ֆինանսական այդ միջոցներնուղղելով սպառման, բարձր վարձատրվող ռելոկանտները Հայաստանում նաև գնաճի միտում են ստեղծում։
Ուստի ԿԲ–ի նպատակն է, որպեսզի այդ միջոցներն ուղղվեն ոչ թե սպառմանն, այլ խնայողություններին, ինչը կնպաստի նաև գնաճային միտումների նվազմանը։
Անդրադառնալով տնտեսական աճի կառուցվածքին` Մարտին Գալստյանն ասաց, որ տնտեսության հիմնական ճյուղերն են մնում ծառայությունների, առևտրի, շինարարության, մասամբ` նաև մշակող արդյունաբերության ոլորտներն են։
«Մենք շարունակում ենք մնալ այն մտքին, որ այս տարի ևս հիմնական տնտեսակական ակտիվությունը երկրում շարունակելու են ապահովել ծառայությունների և շինարարության ճյուղերը»,– ասաց Գալստյանը։
Պաշտոնական վիճակագրության համաձայն` 2023թ–ի մարտին տնտեսության տարեկան աճը կազմել է 14 տոկոս։ Ամենաբարձր աճն արձանագրվել է արտաքին առևտրում` 149.5 տոկոս։ Ներքին առևտուրն աճել է 126.1 տոկոսով, ծառայությունները` 21.9-ով, շինարարությունը` 19-ով։ Արդյունաբերության աճը տնտեսական աճի կառուցվածքում կազմել է 8.6 տոկոս։