ԵՐԵՎԱՆ, 2 մայիսի – Sputnik. Առողջապահության նախարար Անահիտ Ավանեսյանի Հնդկաստան կատարած այցի արդյունքում երկու երկրների միջև նախապատրաստվում են համաձայնագրեր, որոնց ստորագրմամբ առողջապահության ոլորտում հայ-հնդկական համագործակցության համար նոր էջ կբացվի: ԱՆ մամուլի ծառայությունը հայտնում է, որ այս մասին խոսվել է այսօր նախարարի և Հայաստանում Հնդկաստանի նորանշանակ դեսպան Նիլակշի Սահա Սինհայի հանդիպման ժամանակ։
Համաձայնագրերից մեկը վերաբերում է դեղագործության ոլորտում Հայաստանի ներուժին։ Նշվում է, որ այն կարող է գրավիչ լինել հնդկական կողմի համար` նաև ԵԱՏՄ շուկա մուտք գործելու տեսանկյունից:
Երկրորդ համաձայնագիրը նախատեսվում է կնքել առողջապահության նախարարության և Հնդկաստանի առողջապահության և ընտանիքի բարեկեցության նախարարության միջև։ Այն վերաբերելու է հանրային առողջությանն ու բժշկագիտությանը։
«Քննարկվել են նաև բժշկական տուրիզմի զարգացման հնարավորությունները, փոխպատվաստման ոլորտում ծառայությունները հասանելիությունը, ինչպես նաև մասնագետների փորձի փոխանակման ծրագրերը»,– նշված է հաղորդագրության մեջ։
Նախարար Ավանեսյանը նաև շեշտել է, որ երկու երկրների միջև քաղաքական երկխոսության մակարդակը շատ բարձր է: