ԵՐԵՎԱՆ, 2 մայիսի - Sputnik. Երևան–Բաքու խաղաղության պայմանագիրն ունի «հարաբերությունների կարգավորման համաձայնություն» անվանումը։ Այս մասին ԱԺ–ում լրագրողների հետ ճեպազրույցում ասաց ՔՊ–ական պատգամավոր Արման Եղոյանը։
Անդրադառնալով նախագծին` Եղոյանը բացատրեց, որ դա խաղաղության վերաբերյալ փաստաթուղթն է։
«Դա հենց այն փաստաթուղթն է, որի մասին լսում էիք, որ մենք ենք խմբագրել, իրենք են խմբագրել վերջին ամիսներին։ Հիմա փաստաթուղթն ունի այդ անվանումը»,–ասաց նա։
Հարցին, թե խաղաղության պայմանագիր անվանումն է փոխվել, թե ոչ, Եղոյանը նշեց, որ հարցին պատասխանելու համար պետք է բովանդակային մանրամասներ ներկայացնի, որը անել չի կարող։
Եղոյանը նաև ընդգծեց, որ Բաքվի հետ բանակցություններում յուրաքանչյուր հարցն էլ շատ կարևոր է։
Նա նշեց` Հայաստանն անում է ամեն ինչ, որ կայանա Բաքու–Ստեփանակերտ երկխոսությունը և Բաքվի հետ բանակցություններում Ստեփանակերտը հանդես գա որպես սուբյեկտ։
Հիշեցնենք` 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին էր փոխանցել հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ էր ավելացրել և ուղարկել իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
2022–ի դեկտեմբերի 22-ին Երևանը հրաժարվեց մասնակցել Հայաստանի, Ռուսաստանի և Ադրբեջանի ԱԳ նախարարների հանդիպմանը` Լաչինի միջանցքի շուրջ ստեղծված իրավիճակի պատճառով։ Այդ ժամանակվանից սկսած հարցը մտավ փակուղի։
2023–ի ապրիլի 20–ին ՀՀ վարչապետ Նիկոլ Փաշինյանն ԱԺ–ում լրագրողներին ասաց, որ ինքը հավատում է խաղաղության օրակարգին, սակայն կարևոր է, որ բանակցություններում նաև նախատեսված լինեն երաշխիքներ։
Ապրիլի 27–ին Ադրբեջանի ԱԳ նախարար Ջեյհուն Բայրամովը հայտարարեց, որ Հայաստանին բանակցությունների սեղանի շուրջ է վերադարձրել Ամերիկայի Միացյալ Նահանգները։
Մայիսի 1-ին ԱՄՆ Արլինգտոն քաղաքում կայացել է Ադրբեջանի ԱԳ նախարար Ջեյհուն Բայրամովի և Հայաստանի ԱԳ նախարար Արարատ Միրզոյանի երկկողմ հանդիպումը։ Նույն օրը Վաշինգտոնում էլ տեղի է ունեցել եռակողմ` հանդիպում Արարատ Միրզոյանի, ԱՄՆ պետքարտուղար Էնթոնի Բլինկենի և Ադրբեջանի ԱԳ նախարար Ջեյհուն Բայրամովի հանդիպումը։
Հավելենք, որ Հայաստանի ու Ադրբեջանի միջև խաղաղության գործընթացի հարցում միջնորդ դառնալու պատրաստակամություն են հայտնել և՛ ՌԴ–ն, և՛ ԱՄՆ–ն, և՛ Արևմուտքը։