ԵՐԵՎԱՆ, 30 ապրիլի – Sputnik. Երևանի «Միկա» մարզահամալիրում անցկացվող բռնցքամարտի Եվրոպայի երիտասարդական առաջնությունում Վազգեն Բադալյանի գլխավորած Հայաստանի հավաքականի 10 բռնցքամարտիկ դուրս է եկել կիսաեզրափակիչ՝ ապահովելով առնվազն բրոնզե մեդալներ:
Կիսաեզրափակիչում են Հովհաննես Հարությունյանը (48 կգ), Արթուր Մկրտչյան (63,5 կգ), Յուրա Բաբլումյան (67 կգ), Արման Միսկարյանը (71 կգ), Արմեն Պողոսյան(75 կգ), Աղվան Ալեքսանյանը (80 կգ), Դավիթ Սիմոնյանը (86 կգ), Ալբերտ Հարությունյանը (+92 կգ) և Լիլիթ Ասատրյանը (63 կգ): Իշխան Հովսեփյանը (92 կգ) մեկնարկելու է կիսաեզրափակչից․ նա արդեն ապահովել է իր բրոնզե մեդալը:
Ապրիլի 30-ին Եվրոպայի առաջնության կիսաեզրափակիչի ուղեգրի համար կպայքարեն Դավիթ Սաֆարյանը (51 կգ), Էրիկ Առստամյանը (54 կգ), Գոռ Ազիզյանը (57 կգ) և Ոսկան Ոսկանյանը (60 կգ)։ Կանանց հավաքականից քառորդ եզրափակիչում ռինգ դուրս կգա Լուսինե Գևորգյանը (48 կգ): Լուսինե Գևորգյանը կիսաեզրափակիչի ուղեգիրը կվիճարկի ռումինացի Միհայլա Բադեսկուի հետ: Նա հանդես կգա ցերեկային մրցահերթում, որը կմեկնարկի 13:30-ից:
Հայաստանի մյուս 4 ներկայացուցիչները ռինգ դուրս կգան երեկոյան մրցահերթում՝ 17:30-ից: Դավիթ Սաֆարյանի մրցակիցը Իսրայելի ներկայացուցիչ Յուրի Լապչևսկին է:
Էրիկ Առուստամյանը կմենամարտի Սլովակիան ներկայացնող Լուկաս Վիմիսլիցկիի հետ: Գոռ Ազիզյանը կմրցի իսրայելցի Ալի Շահավանի հետ: Ոսկան Ոսկանյանի մրցակիցը Հունգարիան ներկայացնող Օլահ Լեվենտեն է:
Նշենք, որ Եվրոպայի առաջնությանը մասնակցելու համար Երևան են ժամանել 27 երկրների 300-ից ավելի բռնցքամարտիկներ։