ԵՐԵՎԱՆ, 29 ապրիլի – Sputnik. Այսօր փորձ է արվում թույլ չտալ քաղաքական, քաղաքացիական և քաղաքագիտական մտքի զարգացումը, բայց հենց օրինապահության վրա պիտի կառուցվի ՀՀ ապագան: Այս մասին ասել է ՀՀ վարչապետ Նիկոլ Փաշինյանը Քաղաքացու օրվա առթիվ հղած իր ուղերձում։
Փաշինյանը շեշտել է, որ 2018 թվականի «թավշյա հեղափոխությունից» հետո Հայաստանի Հանրապետությունում որևէ մակարդակի որևէ ընտրություն չի կեղծվել, և քաղաքացին հնարավորություն է ունեցել կայացնել որոշումներ՝ ավագանի, համայնքի ղեկավար, Ազգային ժողով և վարչապետ ընտրել ազատ կամարտահայտությամբ:
«Հենց սա էր 2018 թվականի Հեղափոխության առաջնային և առանցքային նպատակներից մեկը, որ իրագործված է լիովին: Հայաստանի Հանրապետությունում չկան քաղբանտարկյալներ, չկա որևէ միտք, գաղափար, տեղեկատվություն, որ հնարավոր չէ հանրությանը հասցնել հեռուստատեսային եթերով կամ զանգվածային լրատվության միջոցներով, սոցիալական ցանցերը, քաղաքական, հանրային և տնտեսական գործունեությունն ազատ են լիովին»,–նշել է Փաշինյանը:
Անդրադառնալով ընդդիմախոսների պնդմանը, թե ավելի լավ էր երկրում չունենալ ժողովրդավարություն, բայց և չունենալ այն աղետալի ձախողումները, որ ունեցանք 44-օրյա պատերազմում և դրանից հետո, Փաշինյանը հայտարարել է.
«Գոնե այսօր պիտի համարձակություն ունենամ ասելու. այդ աղետները վրա հասան երկար տարիներ ժողովրդավարություն, օրինականություն, քաղաքացիական ազատ բանավեճ չունենալու հետևանքով, այն տաբուների, կաղապարների և «ճշմարտությունների» պատճառով, որոնք ստեղծվել էին բարեհունչ վերնագրերի ներքո, բայց ո՛չ հանուն պետականության: Մենք ժամանակին չկարողացանք հաղթահարել այդ տաբուներն ու կաղապարները և դա էր, թերևս, մեր մեծագույն ձախողումը»:
Փաշինյանը վստահ է, որ ՀՀ քաղաքացին պարտավոր է լինել հպարտ, որովհետև այսպես դիմակայել դարակազմիկ մարտահրավերներին՝ երկիրն ու տնտեսությունը զարգացնելով, ժողովրդավարության էությանն ու արժեքներին չդավաճանելով՝ հպարտության իրական աղբյուր է:
Հիշեցնենք, որ «Տոների և հիշատակի օրերի մասին» օրենքում կատարված փոփոխությամբ 2019 թվականից ապրիլի վերջին շաբաթ օրը նշվում է որպես Հայաստանի Հանրապետության քաղաքացու օր։
Այս օրը նշվել է միայն 2019 թվականին, միջոցառումներ են նախատեսված նաև այս տարի։
ՀՀ բոլոր մարզերում և Երևան քաղաքի տարբեր վարչական շրջաններում` ընդհանուր առմամբ 66 համայնքում, այսօր նախատեսված է կազմակերպել Քաղաքացու օրվան նվիրված միջոցառումներ։
Միջոցառումները բաղկացած են 2 մասից՝ բանախոսություն և մշակութային միջոցառում:
Երևանում բանախոսությունները մեկնարկելու են ժամը 12:00-ին, իսկ մշակութային միջոցառումները՝ ժամը 13:30-ին: Մարզերում բանախոսությունները նախատեսված են ժամը 11:00-ին և 15:00-ին, որոնց հաջորդելու են մշակութային միջոցառումները: