ԵՐԵՎԱՆ, 28 ապրիլի – Sputnik. Հաջորդ շաբաթ Բրյուսելում տեղի կունենա Ադրբեջանի և Եվրամիության (ԵՄ)` էներգետիկայի թեմայով երկխոսությունը։ Տեղեկությունը հայտնում է Եվրահանձնաժողովի էներգետիկայի գլխավոր տնօրինությունը։
«Հաջորդ երեքշաբթի՝ մայիսի 2-ին, էներգետիկայի հարցերով եվրահանձնակատար Կադրի Սիմսոնը Բրյուսելում կհանդիպի Ադրբեջանի էներգետիկայի նախարար Փարվիզ Շահբազովի հետ»,- նշված է հայտարարության մեջ։
Բրյուսելում կողմերը կամփոփեն էներգետիկ ոլորտում ԵՄ-ի և Ադրբեջանի համագործակցության արդյունքները և կքննարկեն առաջընթացը։ Կարծիքներ կփոխանակեն գազի մատակարարման հետ կապված իրավիճակի շուրջ, կքննարկեն Հարավային գազային միջանցքի (SGC) ընդլայնումը, «մաքուր էներգիայի» անցնելու շուրջ համագործակցությունը։
Նշվում է նաև, որ երկխոսությանը կմասնակցեն նաև Եվրոպական ներդրումային բանկի ու Վերակառուցման և զարգացման եվրոպական բանկի ներկայացուցիչները։